Ռուսաստանի նախկին պաշտպանության նախարար Անատոլի Սերդյուկովը կասկածվում է պաշտոնեական անփութության մեջ, ինչը հանգեցրել է 56 մլն ռուբլու վնասի: Այս մասին «Իտար-Տասսին» հայտնել է ՌԴ քննչական կոմիտեի պաշտոնական ներկայացուցիչ Վլադիմիր Մարկինը:
«Ըստ քննչական տվյալների, Անատոլի Սերդյուկովը, լինելով պաշտպանության նախարար, բանավոր կերպով հրահանգել է ենթականերին պետական բյուջեի միջոցներով կառուցել ավտոտրանսպորտային ճանապարհ Աստրախանի մարզի Իկրյանսկ շրջանի Կրասա գյուղից մինչև Շկոլնի կղզին, որի վրա գտնվում է «Ժիտնոյե» ոչ առևտրային ընկերությունը (հանգստի գոտի՝ մեկն.՝ Իտար-Տասս):
Իր հրահանգը Սերդյուկովը հիմնավորել է` որպես ցանկություն, ստեղծել Պաշտպանության նախարարության կարիքների համար հանգստի բազա: Բացի այդ, նախկին նախարարի հրահանգով բարեկարգման աշխատանքներ են տարվել «Ժիտնոյե» հանգստի գոտու տարածքում:
Հարկ է նշել, որ կանաչապատման աշխատանքները կատարել են ավիացիոն զորքերի զինվորները, իսկ ավտոտրանսպորտային ճանապարհի շինարարությունը՝ երկաթուղային գումարտակի զինվորները:
Ընդ որում պետական բյուջեի միջոցների ծախսը հիմնավորող կամ Պաշտպանության նախարարության որևէ իրավունք այդ ճանապարհի կամ հանգստի գոտու նկատմամբ հաստատող փաստաթուղթ չի ձևակերպվել», -հայտնում է Վլադիմիր Մարկինը:
ՌԴ քննչական կոմիտեի պաշտոնական ներկայացուցիչ Վլադիմիր Մարկինի խոսքերով այդ գործողությունների արդյունքում պետությանը հասցվել է 56 մլն ռուբլու վնաս:
Միայն քրեական գործի քննության արդյունքում ավտոճանապարհը և հանգստի գոտին 2013թ.-ին ներառվել են ՊՆ հաշվեկշռում:
ՌԴ Քննչական կոմիտեի Գլխավոր ռազմական քննչական վարչության կողմից նախկին պաշտպանության նախարարի նկատմամբ հարուցվել է քրեական գործ ՌԴ Քրեական օրենսգրքի 293 հոդվածի 1-ին մասի հատկանիշներով (Պաշտոնեական անփությույուն):
Այս հոդվածով նախատեսված առավելագույն պատիժն է հարկադիր աշխատանք՝ մինչև մեկ տարի ժամկետով կամ ազատազրկում մինչև երեք ամիս ժամկետով:
Լուսանկարը` «Իտար-Տասս»-ի
