Ազգային ժողովի նախագահ Ալեն Սիմոնյանը հրաժարվել է մեկնաբանել Ռուսաստանի արտգործնախարարության ներկայացուցիչ Մարիա Զախարովայի հայտարարությունը, թե «Ռուսաստանը հայ խորհրդարանականներին կոչ է անում կիսվել ուկրաինական Բուչա քաղաքում «իբր ռուսների կողմից սպանվածների ցուցակով», որը նրանց է փոխանցել Կիևը»:
Ալեն Սիմոնյանը լրագրողների հետ այսօրվա ճեպազրույցում ասել է, որ ինքը գործելաոճ դարձած աբսուրդ հայտարարություններ և ստեր չի մեկնաբանում:
«Կարող եմ տիկին Զախարովային կամ Ռուսաստանի ԱԳՆ-ին խնդրել՝ մեր լրատվականը կամ որպես պատգամավոր իմ օգնականը փոխանցի, օրինակ, Լեռնային Ղարաբաղում վերջին իրադարձությունների ժամանակ կամ ռազմական գործողությունների ժամանակ 200-ից ավելի մահացած հայերի անունը, կարող եմ էն 100 հազարից ավելի փախստականների անունը փոխանցել տամ, եթե իրանց հետաքրքիր է, էն տարածքում, որտեղ իրանք խաղաղապահ գործունեություն էին ծավալում, եթե իրանց հետաքրքիր է: Բայց, ընդհանուր առմամբ, ես աբսուրդներ ու ստեր չեմ մեկնաբանում»,- ասել է Ալեն Սիմոնյանը:
