2013 թվականի սեպտեմբերի 6-ին «ՍԻՐՈՒՆՅԱՆ» իրավաբանական գրասենյակի կողմից Վճռաբեկ դատարան է ներկայացվել ոստիկանությունում խոշտանգումների ենթարկված Գրիշա Վիրաբյանի վերաբերյալ թիվ 27203404 քրեական գործը նոր հանգամանքերի հիմքով վերանայելու մասին բողոքը:
Մինչեւ օրս՝ շուրջ մեկուկես ամիս անց, բողոքի ընթացքը Վճռաբեկ դատարանի կողմից չի լուծվել, թեեւ՝ այն պետք է լուծվեր 10-օրյա ժամկետում:
Այս մասին հայտարարություն է տարածել «Սիրունյան» իրավաբանական գրասենյակը:
Հիշեցնենք՝ ՄԻԵԴ-ը 2012 թվականին «Գրիշա Վիրաբյանն ընդդեմ Հայաստանի Հանրապետության» գործով կայացրած վճռով պարտավորեցրել էր Հայաստանի Հանրապետությանն իբրև փոխհատուցում վճարել 31 հազար եվրո:
Մարդու իրավունքների եվրոպական դատարանում ընդունված վճռի համաձայն՝ Հայաստանում 2004 թվականի հետընտրական քաղաքական իրադարձությունների ժամանակ Գրիշա Վիրաբյանը ոստիկանական բաժանմունքներում խոշտանգումների է ենթարկվել: Գ. Վիրաբյանի խոսքով՝ իրենց խոշտանգելու մեջ մեծ դեր է ունեցել Երևան քաղաքի ոստիկանապետ Աշոտ Կարապետյան:
Իրավաբան.net
