Փաստաբանների պալատի նախագահի պաշտոնից հեռանալիս Ռուբեն Սահակյանը տխուր չէ, հակառակը՝ ուրախ է. գիտակցում է, որ նոր ուժ է գալու, որը կկարողանա շարունակել այն դրականը, որը կա և բազմապատկել փաստաբանների հաջողությունները: Այս մասին, քվեարկելուց հետո, լրագրողների հետ զրույցում ասաց ՓՊ նախագահ Ռուբեն Սահակյանը և հավելեց, որ քվերակել է փաստաբանության ապագա զարգացման համար:
«Համոզված եմ, որ ավելի լավ նախագահ է ընտրվելու. ես արդեն հոգնել եմ»,- ասաց Ռուբեն Սահակյանը:
Նա հայտարարեց, որ անկախ այն հանգամանքից, թե ով կընտրվի, ինքը կշնորհավորի ընտրված նախագահին:
Ֆոտոլրագրող Գագիկ Շամշյանը Ռուբեն Սահակյանից հետաքրքրվեց, թե հեռանալիս հնարավոր է արդեն նախկին գլխավոր դատախազ Աղվան Հովսեփյանի պես դուռը համբուրի:
«Դուռը չեմ համբուրելու, որովհետև սրբավայր չի. ամեն մարդ յուրովի է մոտենում իր պաշտոնից հեռանալուն»,- ասաց ՓՊ նախագահը:
Նշենք, որ ՓՊ նախագահ Ռուբեն Սահակյանի պաշտոնավարման ժամկետը լրանում է հոկտեմբերի 3-ին:
Իրավաբան.net
