Հաճախ է պատահում, որ չվերթներն ուշանում են ուղևորի փոխադրման տոմսով նախատեսված ժամից, և ուղևորները ստիպված են լինում սպասել օդանավակայանում:
Ի՞նչ պատասխանատվություն է կրում փոխադրողն այս դեպքում:
Ի գիտություն բոլոր նրանց, ովքեր օգտվում են օդային փոխադրումներից և ստիպված են լինում հաճախ սպասել օդանավակայանում` փոխադրողը պարտավոր է իր կողմից իրականացվող չվերթի՝ ուղևորի փոխադրման տոմսով նախատեսված ժամից ուշացման դեպքում հոգալ ուղևորների կարիքները սկսած`
1) 2 ժամից` սնունդով.
2) 4 ժամից` հաղորդակցության միջոցներով և հնարավորություններով.
3) 8 ժամից` կացարանով:
Փոխադրողը պատասխանատու է ուղևորների, գրանցված ուղեբեռի կամ բեռի օդային փոխադրման ցանկացած ուշացմամբ պայմանավորված վնասի համար, բացառությամբ օրենքով նախատեսված դեպքերի:
Երբ փոխադրողը պատասխանատվություն չի կրում:
Փոխադրողը պատասխանատվություն չի կրում, եթե ապացուցում է, որ ինքը և իր գործակալները վնասից խուսափելու նպատակով ձեռնարկել են բոլոր անհրաժեշտ միջոցները, կամ որ անհնար էր իր կամ գործակալի կողմից ձեռնարկել նման միջոցներ:
Փոխադրողը կարող է պատասխանատվություն չկրել, կամ նրա պատասխանատվության չափը կարող է սահմանափակվել, եթե ապացուցվում է, որ վնաս կրած անձն իր անփութությամբ նպաստել է դրան:
«Միջազգային օդային փոխադրումների որոշ կանոնների միասնականացման մասին» կոնվենցիան (ստորագրվել է Ստրասբուրգ քաղաքում 28.05.1999թ., վավերացվել է Հայաստանի Հանրապետության կողմից) ևս սահմանում է, որ անձանց փոխադրելիս ուշացման հետևանքով պատճառված վնասի դեպքում յուրաքանչյուր ուղևորի նկատմամբ փոխադրողի պատասխանատվությունը սահմանափակվում է փոխառության 4150 հատուկ իրավունքների հանրագումարով:
Նշենք, որ կոնվենցիայի իմաստով փոխառության հատուկ իրավունքում նշված գումարները դիտարկվում են որպես փոխառության հատուկ իրավունքին վերաբերող` ինչպես դրանք սահմանված են Արժույթի միջազգային հիմնադրամի կողմից: Վարույթների դեպքում այդ գումարների փոխարկումը ազգային արժույթների կատարվում է փոխառության հատուկ իրավունքում այդպիսի արժույթների արժեքին համապատասխան՝ վճիռ կայացնելու օրը։
