Երևանի քաղաքապետարանը հայտարարություն է տարածել, որում ասվում է․
«Հարգելի՛ քաղաքացիներ,
օգոստոսի 2-ին՝ ժամը 18:59-ին, Ճգնաժամային կառավարման ազգային կենտրոն ահազանգ է ստացվել, որ Երևանի մետրոպոլիտենի կայարաններում պայթուցիկ սարքեր են տեղադրված։
Դեպքի վայր են մեկնել ԱԻՆ ՓԾ փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի կինոլոգիական խումբը և քաղաքացիական պաշտպանության վարչության քաղաքացիական պաշտպանության ուժերի հավաքական կենտրոնի ինժեներասակրավորական ջոկատը:
Այս պահին մետրոպոլիտենով ուղևորափոխադրումները ժամանակավորապես դադարեցված են: Հայցում ենք Ձեր ներողամտությունը՝ պատճառված անհարմարությունների համար»:
Iravaban.net-ի հետ զրույցում մետրոպոլիտենի մամուլի խոսնակ Տաթև Խաչատրյանն ասաց, որ ժամը 18։59-ի սահմաններում ռումբի առկայության մասին ահազանգ են ստացել և շատ արագ տարհանել են քաղաքացիներին։ Նրա խոսքով՝ այս պահին բոլոր կայարանների դռները փակ են։
