Երկրապահ կամավորականների միությանը ուղերձ է հղել Հայաստանի Առաջին Հանրապետության օրվա առթիվ:

Ուղերձում ասվում է.

Հարգելի՛ հայրենակիցներ, մարտական ընկերներ, երկրապահներ.
1918 թվականի մայիսի 28-ին, մայիսյան հերոսամարտերից` Սարդարապատից, Բաշ-Ապարանից, Ղարաքիլիսայից հետո, մեր ժողովրդի համար ծանր ժամանակաշրջանում ծնունդ առավ Հայաստանի Առաջին Հանրապետությունը: Տեղի ունեցավ առաջին խորհրդարանական ընտրությունը, ստեղծվեց թղթադրամը, մենք ունեցանք պետական օրհներգ, զինանշան, դրոշ:

Մենք կարողացանք մեր համազգային միասնության ու անկոտրում ոգու շնորհիվ իրականություն դարձնել անկախ պետականություն ունենալու մեր դարավոր երազանքը:
Առաջին Հանրապետությունը կարճ տեւեց, սակայն այն մեծ ազդեցություն ունեցավ ցեղասպանությունից վերհառնող մեր ժողովրդի համար իր բնօրրանում վերակերտելու Պետականությունը: Կրկնում ենք եւս մեկ անգամ, մենք պարտավոր ենք մշտապես ուսումնասիրել մեր անցած պատմությունը, դասեր քաղել սխալներից: Պետք է ի գիտություն ընդունենք, որ մեր նվաճումները միասնության ու կայունության արդյունքն են:

Դասեր քաղելով պատմության էջերից մենք 80-ականների վերջին կարողացանք Սպարապետ Վազգեն Սարգսյանի գլխավորությամբ համախմբվել եւ կերտել մեր պատմության հերթական փառահեղ էջը ՝ Արցախյան Ազատամարտը:

Փա՛ռք հանուն հայրենիքի նահատակված քաջերին:

Մենք հաղթահարել ու այսօր էլ հաղթահարում ենք բազում դժվարություններ, եւ շարունակում ենք արարել: Մենք պարտավոր ենք զարգացնել ու հզորացնել մեր պետությունն ու բանակը: Երկրապահը որպես միասնության խորհրդանիշ, ամուր ընտանիք է՝ պատրաստ ծառայելու հայրենիքին: Երկրապահ կամավորականները հավատարիմ իրենց սուրբ գործին միասնական կանգնած են մեր պետության սահմաններում: Երկրապահները չեն հուսահատվել, չեն ընկճվել: Երկրապահները հավատում են, որ հաղթանակները դեռ առջևում են։

Սիրելի՛ հայրենակիցներ
Մեր առջեւ ծառացած մարտահրավերները հաղթահարելու համար մեզ միայն համազգային համախմբվածություն է անհրաժեշտ:

Ինչպես ասել է Սպարապետ Վազգեն Սարգսյանը. «Հայ մարդ, հիմա ուրիշը դու ես: Քո ուրիշը դու ես: Ու ոչինչ, որ սկզբից, հին սովորույթի, վախի, անվստահության, չգիտեմ էլ ինչի պատճառով դու քո մեջ քեզ թշնամի ես որոնում, գտնում ու ուրախանում, որ մեղավոր կա: Ոչինչ, բայց թող դա արագ անցնի: Դու դրան մի հավատա. դու ճանապարհ ունես, դու տուն ունես, դու որդի ունես: Մի հավատա, թե քո թշնամին քեզնից ուժեղ է: Թշնամուդ ուժեղացնողը քո վախն է, քո ցավն է, քո հիմարությունն է»:

Սիրելի՛ հայրենակիցներ,

Շնորհավորում ենք Հայաստանի Առաջին Հանրապետության տոնի առթիվ։ Խաղաղություն եւ բարգավաճում մեր հայրենիքին, ուժ եւ հզորություն մեր բանակին։

Աստված պահապան:

Մեր խոնարհումը հերոսածին մայրերին,

Փա՛ռք Բանակին, Երկրապահին, ազատամարտիկներին,

Փա՛ռք հայ զինվորին,

Փա՛ռք հայ ժողովրդին,

Փա՛ռք Հայաստան, Արցախ, Սփյուռք եռամիասնությանը»: