ԱՄՆ նախագահ Ջո Բայդենը կարծում է, որ Ռուսաստանի դեմ պատժամիջոցները պետք է պահպանվեն Ուկրաինայի հետ հնարավոր մերձեցումից հետո, նրա կարծիքով, դա կարող է հետ պահել Չինաստանին Թայվանին տիրանալու փորձից։ Այս մասին Բայդենը հայտարարել է Տոկիոյում կայացած մամուլի ասուլիսի ժամանակ, հայտնում է Европейская правда-ն։
«Պատճառներից մեկը, թե ինչու Պուտինը պետք է բարձր գին վճարի Ուկրաինայում բարբարոսության համար…պատճառն այն է, որ դա վերաբերում է ոչ միայն Ուկրաինային»,- ասել է Ջո Բայդենը։
Ըստ նրա՝ եթե Ռուսաստանի և Ուկրաինայի միջև որոշակի մերձեցումից հետո ապագայում «պատժամիջոցները հիմնականում չպահպանվեն, ապա ի՞նչ ազդանշան կուղարկի դա Չինաստանին՝ Թայվանը ուժով գրավելու փորձի դեպքում»:
Բայդենը նաև ասել է, որ ԱՄՆ-ը պատրաստ է ուղղակի ռազմական միջամտության՝ Թայվանի դեմ Չինաստանի ագրեսիայի դեպքում։
Նա նաև նշել է, որ չի ակնկալում, որ Չինաստանը կփորձի տիրանալ Թայվանին, սակայն ներխուժումից խուսափելը կախված է նրանից, թե ինչպես աշխարհը կներկայացնի ներխուժման հետևանքները Չինաստանի համար։
