Մարտի 3-ի ԱԺ նիստում խորհրդարանը քննարկել է Կենտրոնական բանկի խորհրդի անդամի ընտրության հարցը:
Այս մասին հայտնում են Ազգային ժողովից:
«Ազգային ժողովի կանոնակարգ» սահմանադրական օրենքի 145-րդ հոդվածի համաձայն` Ֆինանսավարկային եւ բյուջետային հարցերի մշտական հանձնաժողովը Կենտրոնական բանկի խորհրդի անդամի թափուր պաշտոնի համար Ազգային ժողովին է առաջարկել «Քաղաքացիական պայմանագիր» խմբակցության կողմից ներկայացված Լեւոն Սահակյանի թեկնածությունը:
Թեկնածուի կենսագրական տվյալները եւ մասնագիտական աշխատանքային գործունեությունը ներկայացրել է Ֆինանսավարկային եւ բյուջետային հարցերի մշտական հանձնաժողովի նախագահ Գեւորգ Պապոյանը:
Թեկնածուն սովորել է Երեւանի պետական տնտեսագիտական ինստիտուտում, տնտեսագիտական գիտությունների թեկնածու է, ունի դոցենտի գիտական աստիճան: 2019թ. ընդունվել է ՀՊՏՀ «Ֆինանսներ, հաշվապահական հաշվառում» մասնագիտությամբ դոկտորանտուրա: Ունի 14-ից ավելի գիտական հրապարակումներ, ուսումնական ձեռնարկի համահեղինակ է:
Լեւոն Սահակյանը շնորհակալություն է հայտնել «Քաղաքացիական պայմանագիր» խմբակցությանը վստահության համար: Նա անդրադարձել է ֆինանսական կայունության առկա վիճակին եւ մարտահրավերներին, խոսել գնաճի հիմնահարցի ու դրա զսպմանն ուղղված քաղաքականության մասին:
Զեկուցողը փաստել է, որ ԿԲ-ն պատշաճ իրագործում է սահմանադրական նպատակները. այն է` երկրում գների եւ ֆինանսական կայունության ապահովումը: Լեւոն Սահակյանի խոսքով` 2021թ. տնտեսության վերականգնման եւ գնաճի ցուցանիշներով Հայաստանն առավել բարենպաստ դիրքում է:
Թեկնածուն պատասխանել է պատգամավորների հարցերին:
