Սուրեն Պապիկյանը ԵՊՀ հոգաբարձուների խորհրդի նախագահն է, ոչ այն պատճառով, որ այնտեղ պետք է կուսակցության խնդիրներ քննարկի: Այս մասին այսօր՝ դեկտեմբերի 28-ին, մամուլի ասուլիսի ժամանակ ասաց Կրթության, գիտության, մշակույթի և սպորտի նախարար Վահրամ Դումանյանը:
«Պապիկյանը գտնվում է այն բուհում, որտեղ սովորել է և քաջ ծանոթ է, թե այնտեղ ինչ խնդիրներ կան: Նա այնտեղ է, որպեսզի չլինեն այնպիսի երևույթներ, ինչպիսին լինում էին նախկինում: Նախկինում, օրինակ՝ ԵՊՀ-ն ամեն տարի իր համեստ բյուջեից 120 միլիոն դրամ փոխանցում էր Հայաստանի Երիտասարդական հիմնադրամին»,- նշեց Դումանյանը:
Նախարարի խոսքով՝ այժմ տարկետման մեխանիզմները ավելի նպատակային դարձնելու ուղղությամբ քննարկումներ են իրականացվում:
«Նպատակային ասելով հասկանում ենք այնպիսի կարգ, որպեսզի չխախտվի անընդհատ կրթության սկզբունքը որոշ մասնագիտությունների գծով: Շատ լավ է, որ Պապիկյանը նախագահում է բուհի հոգաբարձուների խորհուրդը և ավելի մոտիկից կծանոթանա նաև այդ հարցին»,- ասաց նախարարը:
Անդրադառնալով բուհերի քաղաքականացված լինելուն՝ Դումանյանը հարցեց, թե ինչո՞ւ են միայն Սուրեն Պապիկյանի մասին խոսում, չէ որ Մանկավարժական համալսարանի խորհրդի նախագահն էլ ԿԳՄՍ փոխնախարար Ժաննա Անդրեասյանն է, և հավելեց, որ այսօր բոլոր բուհերը ազատ են և նրանց մեջ չկան քաղաքականացվածներ:
