«Մեր գյուղում ամեն ինչ նորմալ է, մեր տարածքում թուրքերը սսկված, իրանց տեղն են վեր ընկած»,- այս մասին Իրավաբան.net-ին հայտնեց Շուռնուխի գյուղապետ Հակոբ Արշակյանը։
Նա նշեց, որ հարակից տարածքում կան խնդիրներ, որ ճանապարհը փակ է։ Իսկ այդ ճանապարհահատվածը գյուղից հեռու է 10-12 կմ։
«Ես չեմ հասկանում՝ որը որից հետո է, որովհետև ես իրավասու չեմ այնտեղ ներկա գտնվելու։ Չեմ կարող մոտ գնալ, որ անձամբ տեսնեմ՝ կա՞ բանակցություն, թե՝ չկա կամ ո՞վ է այդ բանակցությունը տանում»,- ասաց գյուղապետը։
Հակոբ Արշակյանն ասաց, որ գյուղացիների շրջանում խուճապ չկա։
«Էնքանով է խուճապը, որ իրենք են գալիս ու ինձ ասում՝ կամանդիր, արխային, սաղ լավա լինելու»,- նշեց նա։
Հիշեցնենք, որ ՀՀ ազգային անվտանգության ծառայությունը տեղեկացրել էր, որ օգոստոսի 25-ին ժամը 23:00-ի սահմաններում ադրբեջանական կողմը փակել է Կապան-Գորիս միջպետական ճանապարհի Կարմրաքար-Շուռնուխ հատվածը: Ըստ ԱԱԾ հաղորդագրության` նշված հատվածում գտնվող տրանսպորտային միջոցները տարհանվել են և աշխատանքներ են իրականացվում ճանապարհը բացելու, մարդկանց և տրանսպորտային միջոցների տեղաշարժի բնականոն աշխատանքը վերականգնելու ուղղությամբ:
Ավելի ուշ, Հայաստանի մարդու իրավունքների պաշտպան Արման Թաթոյանը հայտնել էր, որ ադրբեջանցի զինծառայողները փակել են նաև ՀՀ Սյունիքի մարզի Գորիսից Որոտան տանող ճանապարհը:
ԱԱԾ սահմանապահ զորքերի հրամանատարի տեղակալ Արմեն Մկրտչյանը Հանրային հեռուստաընկերության հետ զրույցում հավաստիացրել է, որ քաղաքացիների հետ կապված որևէ խնդիր չկա: Նրա խոսքով՝ տարհանվել են Կապան-Գորիս ճանապարհի հատվածում գտնվող տրանսպորտային միջոցները, այդ թվում՝ բեռնատար, մարդատար, ինչպես ՀՀ, այնպես էլ արտասահմանյան պետհամարանիշներով մեքենաները:
