ՀՀ վարչեպետ Նիկոլ Փաշինյանը ֆեյսբուքյան իր էջում հորդորում է, որպեսզի յուրաքանչյուր քաղաքացի կորոնավիրուսից պաշտպանվելու կանոնների մասին հայտարարություն տարածի ֆեյսբուքյան էջում: Նա նաեւ հայտարարության տեքստն է առաջարկել:
«Սիրելիներս, խնդրում եմ՝ ամեն մեկդ արեք Ձեր բաժին հայտարարությունը Ձեր ֆեյսբուքյան էջի ուղիղ եթերում, կամ տեսագրեք հայտարարությունը եւ տեղադրեք Ձեր էջում։
Ստորեւ ներկայացնում եմ տեքստը։ Շնորհակալություն աջակցության համար։
Ուշադրություն, խոսում է ՀՀ քաղաքացի Այսինչ Այսինչյանը (սա որպես տարբերակ. ինքներդ ընտրեք՝ ինչպես ներկայանալ)։
Սիրելի հայրենակիցներ, Հայաստանի Հանրապետությունում կորոնավիրուսի համաճարակ է:
Բոլորիդ կոչ եմ անում կրել դիմակներ եւ դրանք հանել միայն սնվելիս: Դիմակը պետք է կրել այնպես, որ այն փակի ձեր քիթը եւ բերանը: Պարբերաբար ախտահանեք ձեր ձեռքերը եւ չախտահանված ձեռքերով մի դիպեք ձեր դեմքին:
Պահպանեք մեկուկես մետր սոցիալական հեռավորություն եւ բացառեք առանց դիմակի շփումը ձեր ընտանիքի անդամ չհանդիսացող անձանց հետ:
Սիրելի հայրենակիցներ, կրեք դիմակներ եւ դրանով կփրկեք հարյուրավոր կյանքեր:
Դիմակները անհրաժեշտ է փոխել երեք-չորս ժամը մեկ: Կարող եք օգտագործել ոչ միայն գործարանային արտադրության, այլեւ ձեր կողմից պատրաստած դիմակներ:
Սիրելի հայրենակիցներ,
շնորհակալություն եմ հայտնում մեր այն հայրենակիցներին, ովքեր պահպանում են հակահամաճարակային կանոնները կամ եթե նույնիսկ նախկինում չեն պահպանել, այս կոչին անսալով կսկսեն պահպանել դրանք»,- ասված է վարչապետի առաջարկած տեքստում։
Հիշեցնենք, որ ԱԺ այսօրվա արտահերթ նիստում վարչապետն իր եզրափակիչ ելույթի տասը րոպեն օգտագործեց ոստիկանական մեքենաներից հնչող հակահամաճարակային հայտնի հորդորն անընդմեջ հնչեցնելու համար: Նա այդ հայտարարությունն ընթերցեց 6 անգամ:
