Կոտայքի մարզպետ Ռոմանոս Պետրոսյանը ֆեյսբուքյան իր էջում տեղեկացրել է, որ այցելել է Չարենցավանի բժշկական կենտրոն։
«Ինչպես արդեն նշել էի, համավարակի այս շրջանում այցելելու եմ մարզի խոշոր բուժկենտրոններ, մեծ ու փոքր համայնքների բուժամբուլատորիաներ և առողջության առաջնային պահպանման կենտրոններ՝ տեղում ծանոթանալու պայմաններին ու համավարակի դեմ արդյունավետ պայքարելու անհրաժեշտ միջոցներով ապահովվածությանը:
Աշխատանքային այցով եղա Չարենցավանի բժշկական կենտրոնում, որտեղ հանդիպում ունեցա մեր հարգելի բուժաշխատողների հետ՝ համավարակի դեմ պայքարի այս փուլում կատարված աշխատանքները քննարկելու և հետագա անելիքների վերաբերյալ մտքեր փոխանակելու նպատակով:
Չարենցավանը Կոտայքի մարզի այն համայնքներից է, որտեղ առաջինը համավարակի բռնկում եղավ և բոլորս քաջ գիտակցում ենք, որ ամենը, ինչի միջով անցել և շարունակում են պատվով անցնել մեր բուժաշխատողներն, իսկական հերոսություն է:
Ի պատիվ Չարենցավանի ԲԿ-ի բուժանձնակազմի, ուրախությամբ կարող եմ ասել, որ ոչ միայն հաջողվել է տեղայնացնել կորոնավիրուսի վարակման հիմնական օջախներից մեկն, այլև մարել ու դեպքերի անկում գրանցել:
Իմ, Կառավարության, մարզպետարանի և պարզապես մեր քաղաքացիների անունից շնորհակալության խոսքեր փոխանցեցի մեր բուժաշխատողներին և հայտնեցի իմ պատրաստակամությունը՝ համավարակի հաղթահարումից հետո միասին ձեռնամուխ լինելու նոր որակի ու չափորոշիչների համապատասխան, նոր փորձառությամբ ու համավարակներին դիմակայելու պատրաստ բժկական կենտրոն ունենալու գործին:
Չարենցավանի ԲԿ-ն պետք է դառնա ժամանակակից ու հզոր սարքավորումներով զինված բժշկական կենտրոն ու առաջատարներից մեկը լինի մեր տարածաշրջանում:
Բոլորս միասին պետք է լծվենք մեր երկրում առողջապահության համակարգի կայացման աշխատանքներին:
Բժշկական կենտրոնի տնօրենի հետ դիտարկեցինք հիվանդանոցին կից կառուցվող հատվածը, որտեղ ներկա պահին շինարարական ակտիվ աշխատանքներ են ընթանում:
Աշխատանքների ավարտից հետո տարածքը կծառայի կորոնավիրուսային վարակ ունեցող մեր քաղաքացիների սպասարկմանը, իսկ հետագայում նույն տարածքում կտեղակայվի բուժկենտրոնի ինֆեկցիոն բաժանմունքը:
Եվս մեկ անգամ իմ խորին շնորհակալությունն եմ հայտնում մեր սիրելի բուժաշխատողներին»:
