Մայիսի 6-ին ուժի մեջ է մտնում կորոնավիրուսի տնտեսական հետևանքների չեզոքացման տասնվեցերորդ միջոցառման վերաբերյալ կառավարության որոշումը։

1․Կորոնավիրուսի տնտեսական հետևանքների չեզոքացման տասնվեցերորդ միջոցառման (այսուհետ՝ միջոցառում) նպատակն է օժանդակել կորոնավիրուսի տարածման հետևանքով գոյացած դժվարությունների արդյունքում սոցիալական խնդիրների առջև կանգնած մի խումբ անձանց:

2. Միջոցառման շահառու են հանդիսանում՝

1) բնական գազի մատակարարման և էլեկտրական էներգիայի մատակարարման պայմանագիր կնքած այն բնակիչ բաժանորդները, որոնց 2020 թվականի փետրվար ամսվա ծախսը կազմել է՝

ա. բնական գազի սպառման գծով՝ 30 001-40 000 դրամ ներառյալ,

բ. էլեկտրական էներգիայի սպառման գծով՝ 10 001-25 000 դրամ ներառյալ, բացառությամբ սույն կետի 2-րդ ենթակետի.

2) այս ցանկում ներառված չգազիֆիկացված բնակավայրերի էլեկտրական էներգիայի մատակարարման պայմանագիր կնքած այն բնակիչ բաժանորդները, որոնց 2020 թվականի փետրվար ամսվա էլեկտրական էներգիայի սպառման գծով ծախսը կազմել է մինչև 25 000 դրամ ներառյալ.

3) խմելու ջրի մատակարարման և (կամ) ջրահեռացման պայմանագիր կնքած այն բնակիչ բաժանորդները, որոնց 2020 թվականի մարտ ամսվա ծախսը կազմել է մինչև 3000 դրամ ներառյալ:

3. Աջակցությունը տրամադրվում է սույն հավելվածի 2-րդ կետի՝

1) բնական գազի մատակարարման և էլեկտրական էներգիայի մատակարարման պայմանագիր կնքած բաժանորդի կողմից 2020 թվականի փետրվար ամսվա ընթացքում սպառված համապատասխանաբար բնական գազի և էլեկտրական էներգիայի դիմաց վճարի 30 տոկոսի չափով.

2) չգազիֆիկացված բնակավայրերի էլեկտրական էներգիայի մատակարարման պայմանագիր կնքած յուրաքանչյուր բաժանորդի կողմից 2020 թվականի փետրվար ամսվա ընթացքում սպառված էլեկտրական էներգիայի դիմաց վճարի 50 տոկոսի չափով.

3) խմելու ջրի մատակարարման և (կամ) ջրահեռացման պայմանագիր կնքած յուրաքանչյուր բաժանորդի կողմից 2020 թվականի մարտ ամսվա ընթացքում մատուցված խմելու ջրի մատակարարման և (կամ) ջրահեռացման ծառայության դիմաց վճարի 50 տոկոսի չափով:

Միջոցառման 3-րդ կետի համաձայն որոշված ընդհանուր գումարը փոխանցվում է բնական գազ, էլեկտրական էներգիա մատակարարող ընկերություններին, խմելու ջրի մատակարարման և ջրահեռացման ծառայություն մատուցած «Վեոլիա ջուր» փակ բաժնետիրական ընկերությանը՝ միջոցառման շահառու համարվող բնակիչ բաժանորդներին հետագա փոխանցման պայմանով։ Ընդ որում, պարտքի առկայության դեպքում այդ գումարն ուղղվում է բնակիչ բաժանորդի ունեցած պարտքի մարմանը, իսկ դրա բացակայության դեպքում՝ ձևակերպվում որպես կանխավճար:

ՉԳԱԶԻՖԻԿԱՑՎԱԾ ԲՆԱԿԱՎԱՅՐԵՐԻ ՑԱՆԿ