Հանրապետության նախագահ Արմեն Սարգսյանի նախաձեռնած՝ «Նախագահական համերգաշար»-ի շրջանակում անցյալ տարի նախագահական նստավայրում անցկացվեց հայկական ռոմանսի երեկո: Այդ օրն ունկնդիրը մասնակից դարձավ անմոռանալի մի երեկոյի, որի ինքնատիպ զարդն Ալ․ Սպենդիարյանի անվան օպերայի և բալետի ազգային ակադեմիական թատրոնի առաջատար մեներգչուհի, Հայաստանի Հանրապետության վաստակավոր արտիստուհի, միջազգային մրցույթների եռակի ոսկե մեդալակիր և երեք «Գրան պրի»-ների դափնեկիր Անահիտ Մխիթարյանի կատարումներն էին:
Այս մասին տեղեկացնում են նախագահի աշխատակազմի հասարակայնության հետ կապերի վարչությունից։
Կորոնավիրուսի համավարակով պայմանավորված՝ մշակութային կյանքը շատ այլ ոլորտների նման հարկադրված դադարի մեջ է: Սակայն տանը մեկուսացած լինելով հանդերձ՝ արվեստագետը չի կարող փակվել ինքն իր մեջ, առավել ևս՝ չստեղծագործել: Այդ մասին երգչուհին հավաստիացրել է նախագահ Արմեն Սարգսյանի հետ հեռավար զրույցում՝ նշելով, որ որ տանը մնալով էլ շարունակում է երգել: Ճիշտ է, այս դեպքում խոսքը համերգային բեմի կամ բազմահազարանոց դահլիճի մասին չէ, սակայն կյանքը շարունակվում է:
Նախագահ Սարգսյանը հետաքրքրվել է Անահիտ Մխիթարյանի ծրագրերով, որոնք, ինչպես շատ արվեստագետների պարագայում, ժամանակավորապես առկախված են: Նախագահը քաջալերել է երգչուհուն՝ շարունակել ստեղծագործել, նշելով, որ նրա ստեղծագործական գործունեությունը շարունակում է պահանջարկված մնալ արվեստասերների շրջանում, և ժամանակավոր դադարը չի նշանակում հանդիսատես-արվեստագետ կապի ընդհատում: Նախագահը և երգչուհին խոսել են նաև ստեղծված իրավիճակում առցանց «համերգ»-ի հնարավորության մասին:
Ակնկալվում է, որ ապագայում նույնպես «Նախագահական համարգաշար»-ի շրջանակում համագործակցությունը երգչուհու հետ կշարունակվի:
