Վարչապետ Նիկոլ Փաշինյանը ֆեյսբուքյան ուղիղ եթերի ժամանակ հայտնել է, որ կառավարության հիմնական խնդիրը ոչ թե կորոնավիուսը կանխելն է, այլ՝ մահերից խուսափելը։
Նշենք, որ Փաշինյանը քիչ առաջ հայտնեց ևս 4 վարակվածի մասին։ Այսպիսով, ընդհանուր առմամբ, ՀՀ-ում կա 194 վարակված անձ։
Նա նշեց, որ կառավարության գործողությունների 2 ուղղություն կա․ «65-ից բարձր տարիքային խմբում մենք ունենք 9 հիվանդ, 70-ից՝ երեք հոգի, 80-ից բարձր հիվանդ չունենք, սա նշանակում է՝ ամենասուր ռիսկային գոտում հիվանդ չունենք։ Մարտի 22-ի դրությամբ երկրում կորոնավիրուսով վարակվածներից 14-ն ունեն թոքաբորբ, նրանցից 6-ն ինտենսիվ թերապիայի կարիք ունեն։ Կորոնավիրուսը վտանգավոր է հատկապես 75-ից բարձր տարիքային խմբի համար, պետք է բացառվի թոշակառուների՝ փոստային ծառայությունից օգտվելը»,-նշել է նա:
Նա նշել է, որ այս իրավիճակից ավելի ուժեղացած դուրս կգան այն երկրները, որոնք կհասցնեն տնտեսության հետագա զարգացումն ապահովող երկարաժամկետ ռազմավարական բնույթի որոշումներ կայացնել։ Կառավարությունը որոշել է լայն աջակցություն ցուցաբերել տնտեսությանն ու տնտեսվարողին, որը, իր հերթին, օգտակար կլինի նաև այլ մարդկանց:
«Արդեն իսկ պատրաստվում են արտոնյալ վարկերի փաթեթներ ընկերությունների համար, որոնք կունենան աջակցության կարիք՝ աշխատողների աշխատավարձերը վճարելու, հարկայաին պարտավորությունները կատարելու, հումք ներկրելու և արտադրությունը կազմակերպելու համար: Կառավարությունը որոշել է 30-60%-ով մասնակցություն ունենալ տնտեսվարողին ֆինանսավորման պրոցեսին և սուբսիդավորել վարկերը, որ տնտեսվարողները հավելյալ վճարումներ չունենան»,- Փաշինյանը կարևորել է հատկապես գյուղատնտեսության ոլորտում արվող ներդրումները: Նա նշել է, որ գործադիրն աջակցություն կցուցաբերի անհատներին, որոնք առաջարկված գյուղատնտեսական ծրագրերով մասնակցություն են ունենում ոլորտի զարգացմանը: Նման պարագայում՝ Կառավարությունը կզրոյացնի վարկային բոլոր տոկոսները և կունենա ֆինանսավորման մասնակցություն՝ անհատների պարագայում մինչև 30%:
«Վատ վարկային պատմություն ունեցող քաղաքացիները, որոնք ցանկանում են գյուղատնտեսության ոլորտի ծրագրերին մասնակցություն ունենալ, իրենց համայնքներում կարող են ձևավորել գյուղացիական կոոպերատիվներ, այդ պարագայում Կառավարրությունը կարող է 50-70 %-ով մասնակցություն ունենալ»,-նշել է վարչապետը:
Փաշինյանը հայտնել է, որ Ռուսաստանից Վրաստանի տարածքով ՀՀ է ժամանել մեր 140 համաքաղաքացի՝ չնայած ՌԴ և վրացական կողմի արգելքներին: Նա ՌԴ-ում գտնվողներին խորհուրդ է տվել ՀՀ գալու համար օգտվել բացառապես օդային տրանսպորտից: Վարչապետն ասել է, որ աշխարհում չկա կամ չի լինելու երկիր, որը կկարողանա խուսափել կորոնավիրուսից:
«Չկա մի երկիր, որը կարող է հայտարարել, թե պատրաստ էր կորոնավիրուսին ու գիտի՝ ինչպես բուժել այն։ Մեր մեծագույն խնդիրը ոչ միայն և ոչ այնքան կորոնավիրուսի տարածումը կանխելը, որքան ապահովելը, որ դրա արդյունքում չունենանք մահեր կամ ունենանք նվազագույն մահեր»,- ասել է վարչապետը:
Նա նշել է նաև, որ կորոնավիուսի պատճառով ինչպես աշխարհում, այնպես էլ ՀՀ-ում հնարավոր է աշխատողներ լինեն, որոնք կկորցնեն իրենց աշխատանքը։ Կառավարությունը այդ դեպքերի համար ծրագրեր է մշակում։
Մանրամասները՝ տեսանյութում
