ՀՀ նախագահ Արմեն Սարգսյանի սեպտեմբերի 19-ին հրամանագրի համաձայն, Հայաստանի Հանրապետության ազգային անվտանգության ծառայության տնօրենի տեղակալ Էդուարդ Մարտիրոսյանը նշանակվել է Հայաստանի Հանրապետության ազգային անվտանգության ծառայության տնօրենի պարտականությունների ժամանակավոր կատարող:
Իրավաբան. net-ը հայտնում է, որ 2018 թվականին, ստանձնելով ԱԱԾ պետի տեղակալի պաշտոնը Էդուարդ Մարտիրոսյանը հայտարարագրել է հողամաս, ավտոտնակ, բնակարան և անհատական բնակելի տուն:
Նա հայտարարագրել է նաև 2 մարդատար ավտոմեքենա, KIA SORENTO և GAZ 24:
Էդուարդ Մարտիրոսյանը նաև 10 հազար դոլար փոխառություն է տվել և հայտարարագրել 8 միլիոն դրամը գերազանցող կամ դրան համարժեք արտարժույթից ավելի արժեք ունեցող ոսկյա զարդեր:
Հայտարարագրում նշվել է նաև նրա դրամական միջոցների մասին.
- 20 միլիոն դրամ,
- 95 հազար դոլար,
- 20 հազար եվրո:
Պաշտոնյան եկամտի միակ աղբյուր է նշել աշխատավարձը, որը կազմել է 4 միլիոն 501 հազար դրամ:
2018-ի տարեկան հայտարարագրում ավելացել են եկամտի աղբյուրները.
- Աշխատավարձ-5 միլիոն 964 հազար դրամ,
- Ստացված փոխառություն-10 միլիոն դրամ,
- Ստացված փոխառություն-1 միլիոն դրամ:
Եվգենյա Համբարձումյան
