ՀՀ առաջին փոխվարչապետ Արարատ Միրզոյանը հայտարարություն է տարածել, որում խոսվում է հունիսի 11-13-ը աշխատանքային այցով Հռոմ մեկնելո և մի խումբ եվրոպաբնակ հայազգի գործարարների հետ հանդիպման մասին։

«Հանդիպումներից առաջինը վերաբերում էր Հայաստանում թեթև արդյունաբերության, մասնավորապես կարի արտադրության հետագա զարգացմանը և իտալական նորաձևության հայտնի տների հետ համագործակցությանը։ Քննարկված նախագծերը հնարավորություն կտան լուծել մարզերում բնակվող մի քանի հարյուր կանանց զբաղվածության հարցը։

Հաջորդ հանդիպումների ընթացքում քննարկեցինք Հայաստանում ջրամբարների կառուցման, քաղաքային շինարարության խթանման, վերականգնվող էներգետիկայի, այդ թվում նաև աննախադեպ ծավալով արևային էներգիայի արտադրության մեծացման հնարավորությունները։