Արդարադատության նախարար Դավիթ Հարությունյանը կառավարության հավանությանն է ներկայացրել օրենքի նոր նախագիծ, որով առաջարկվում է ՍՊԸ-ների մասին օրենքի նախագծի 1-ին հոդվածում՝ առաջին պարբերությունից հանել «հետևյալ բովանդակությամբ» բառերը, «քվեարկող բաժնեմաս» բառերը փոխարինել «բաժնեմաս» բառով, քանի որ «Սահմանափակ պատասխանատվությամբ ընկերությունների մասին» Հայաստանի Հանրապետության օրենքի 3-րդ հոդվածի համաձայն սահմանափակ պատասխանատվությամբ ընկերությունների կանոնադրական կապիտալը բաժանված է բաժնեմասերի, որոնք չեն կարող լինել քվեարկող՝ ի տարբերություն բաժնետիրական ընկերությունների, որոնց կանոնադրական կապիտալը համաձայն «Բաժնետիրական ընկերությունների մասին» Հայաստանի Հանրապետության օրենքի 2-րդ հոդվածի պահանջների բաժանվում է ընկերության նկատմամբ բաժնետերերի պարտավորական իրավունքը հավաստող որոշակի թվով բաժնետոմսերի:
Նախագծով նախատեսվող փոփոխությունն առաջացնում է նաև այլ հարաբերությունների կարգավորման անհրաժեշտություն: Խոսքը, մասնավորապես, արտահերթ ընդհանուր ժողովի գումարման հետ կապված ծախսերի փոխհատուցման, արտահերթ ընդհանուր ժողովի գումարում պահանջող մասնակիցների կողմից ներկայացվող պահանջին վերաբերող դրույթների մասին է:
Իրավական ակտի անհրաժեշտությունը. Սույն նախագծի ընդունումը պայմանավորված է սահմանափակ պատասխանատվությամբ ընկերությունների մասնակիցների՝ ընկերության կառավարման իրավունքը կարգավորելու անհրաժեշտությամբ:
Կարգավորման հարաբերությունների ներկա վիճակը եւ առկա խնդիրները. Սույն նախագծով առաջարկվող լրացումները նպատակ ունեն ապահովել մասնակցի՝ «Սահմանափակ պատասխանատվությամբ ընկերությունների մասին» Հայաստանի Հանրապետության օրենքի (այսուհետ՝ Օրենք) 12-րդ հոդվածի (ա) կետով սահմանված ընկերության կառավարմանը մասնակցելու իրավունքը:
Իրավական ակտի կիրառման դեպքում ակնկալվող արդյունքը. Նախագծի ընունման արդյունքում սահմանափակ պատասխանատվությամբ ընկերության արտահերթ ընդհանուր ժողով հրավիրելու իրավունք կունենա(ն) նաեւ գումարային առումով ընկերության առնվազն 10 տոկոս բաժնեմաս ունեցող մասնակից(ներ)ը:
