ՀՀ աշխատանքի և սոցիալական հարցերի նախարարության սոցիալական ապահովության պետական ծառայությունը 2017թ.-ի մարտի 9-ից ապրիլի 6-ը Հայաստանի գրեթե բոլոր ծննդատներում կազմակերպել էր երեխայի ծննդյան միանվագ նպաստն առցանց դիմումի միջոցով ստանալու նոր տեղեկատվական համակարգի հանրային քարոզարշավ: Այս մասին տեղեկացնում են Իրավաբան.net-ին տեղեկացնում են ՀՀ աշխատանքի և սոցիալական հարցերի նախարարության հասարակայնության հետ կապերի բաժնից:
«Ընդամենը 3 քայլ, ընդամենը 10 օր և նպաստի գումարը ձեր հաշվին է» կարգախոսով քարոզարշավի նպատակն էր իրազեկել երեխա ունեցող ընտանիքներին առավել հարմար և նոր հնարավորություններով ծառայությունից օգտվելու տարբերակի մասին: Համացանցին կապ ունեցող ցանկացած սարքից երիտասարդ ծնողները կարող են անմիջապես գրանցվել, և նշելով բանկային հաշվիհամարը կամ նախընտրելի բանկը, առանց Ծառայության տարածքային բաժիններ այցելելու, 10 օրվա ընթացքում ստանալ երեխայի ծննդյան նպաստը:
Գրեթե բոլոր ծննդատներն աջակցել են քարոզարշավին՝ համակարգի մասին իրազեկող պաստառները տեղադրելով ծննդատներում և թույլատրել Ծառայության աշխատակիցներին և կամավորներին հենց տեղերում օգնել ծնողներին գրանցվել կայքում և առցանց դիմումով ստանալ ծննդյան միանվագ նպաստը:
Քարոզարշավի արդյունքում առցանց դիմումների մասին ստացված վիճակագրությունն առավել քան խոսուն է. փետրվար ամսվա համեմատ առցանց դիմումների թիվն աճել է ավելի քան 11 անգամ: Այսպիսով՝ Ծառայությունը քայլեր է ձեռնարկում ինչպես ծառայությունների որակի ու մատչելիության բարձրացման, այնպես էլ՝ թաքնված տարատեսակ կոռուպցիոն ռիսկերի կանխարգելման ուղղությամբ:
*Գրաֆիկում ներկայացված թվերը վերաբերում են ընտանիքում ծնված 1-ին և 2-րդ երեխայի ծննդյանմիանվագ նպաստների դիմումներին
Նոր համակարգի ներդրումը ոլորտի կարևորագույն բարեփոխումներից է և բխում է շահառուների սպասարկման որակի բարելավման և առցանց ծառայությունների ընդլայնման ՀՀ կառավարության ծրագրից:
