Հարցազրույց Հայաստանի երիտասարդ իրավաբանների ասոցիացիայի փաստաբան Մարիամ Զադոյանի հետ:
Ո՞րն էր 2015թ. կարևորագույն իրավական իրադարձությունն Ձեր կարծիքով:
Բաղրամյան պողոտայի ցույցերը, քանի որ առաջին անգամ ունեցանք ոչ քաղաքական ուղղվածության նման կազմակերպված շարժում, որում կարևորում եմ այն հանգամանքը, որ հիմնական մասը կազմում էին երիտասարդները: Կարևորում եմ նաև Սահմանադրական հանրաքվեից առաջ «Ոչ»-ի կազմակերպված նախընտրական քարոզչությունը:
Արդյոք մեր երկում դրական տեղաշարժ է արձանագրվել արդարադատության տեսանկյունից:
Որոշ չափով՝ այո, ինչը պայմանավորված է այն հանգամանքով, որ հիմա անձինք ավելի են իրազեկված և իրացնում են իրենց իրավունքները, հետևաբար ավելի պահանջատեր են:
Կոռուպցիոն իրավական ոլորտում նվազե՞լ, թե՞ աճել է 2015թ.-ին:
Ըստ իս՝ շատ քիչ է նվազել:
Գո՞հ եք գործադիր և օրենսդիր մարմնի աշխատանքներից:
Գործադիրից՝ ոչ. կառավարության մի քանի մարմիններ նույնիսկ հեռախոսազանգերի չեն պատասխանում, ոչ արդյունավետ են աշխատում, հարցումներին պատշաճ չեն պատասխանում, օրենսդիր մարմնից ևս, կարելի է մատերի վրա հաշվել պատգամավորների, որոնք իրոք օրինաստեղծ գործունեություն են իրականացնում:
Ի՞նչ ակնկալիքներ ունեք 2016թ.-ից:
Բազում ակնկալիքներ, նախ որ քաղաքացիական հասարակությունը ավելի ուժեղանա և օրենքի սահմանում իրականացված ցույցերի շնորհիվ պաշտպանի իր իրավունքները, իսկ ինձ վերաբերող ակնկալիքները շատ են: Այս տարի ստացա փաստաբանական արտոնագիր: Նպատակ ունեմ փաստաբանական լուրջ գործունեություն սկսել 2016թ.-ին:
Ո՞րն է տարվա սկանդալային դատական գործը:
Թերևս շատ են քննարկվող գործեր եղել դատարանում այս տարի, բայց որպես սկանդալային դժվարանում եմ մատնանշել որևէ մեկը:
Ի՞նչ զավեշտալի կամ հետաքրքրաշարժ դեպքեր եք հիշում Ձեր պրակտիկայից:
Դեպքերը բազում են, օրինակ՝ երբ գալիս են քաղաքացիները և խնդրում որպեսզի քրեական գործ հարուցենք, իսկ մենք բացատրում ենք, որ դրա իրավասությունը չունենք:
Ինչպե՞ս եք նշում Ամանորը:
Ամանորը նշում եմ ընտանիքիս հետ, սովորություն ունեմ միշտ ժամը 12-ին ամեն վայրկյանի ղողանջի հետ խաղողի հատիկ ուտել և երազանք պահել: Եթե չեմ սխալվում, իսպանացիներն են նման կերպ դիմավորում Ամանորը:
Ի՞նչ հետաքրքիր հուշ կպատմեք Ամանորից:
Նախորդ տարի ամանորյա միջոցառմանը մրցույթներ կային և հատուկ արտադրության գինիներ էին տրվում հաղթողներին: Երեք մրցույթից երկուսում հաղթեցի` ինտելեկտուալ և պարային: 3-րդ մրցույթն էլ միայն տղաների համար էր, չկարողացա մասնակցել:
