Այսօր կայացած հերթական նիստում Հայաստանի Հանրապետության կենտրոնական ընտրական հանձնաժողովը 2016 թվականի տեղական ինքնակառավարման մարմինների հերթական ընտրությունների քվեարկության օրեր է սահմանել 2016 թվականի ապրիլի 17-ը, սեպտեմբերի 18-ը, հոկտեմբերի 2-ը և դեկտեմբերի 11-ը: Այս մասին տեղեկանում ենք Կենտրոնական ընտրական հանձնաժողովին:
Նիստում ՀՀ կենտրոնական ընտրական հանձնաժողովը, հիմք ընդունելով ՀՀ Ազգային ժողովի նախագահի` «Հայաստանի Հանրապետության Ազգային ժողովի պատգամավոր Արփինե Հովհաննիսյանի պատգամավորական լիազորությունները դադարած համարելու մասին» արձանագրությունը, կազմել է արձանագրություն` պատգամավորի մանդատը Հայաստանի Հանրապետական կուսակցության ընտրական ցուցակի հերթական հաջորդ թեկնածու Կարեն Բեքարյանին տալու վերաբերյալ:
