Հայաստանի Հանրապետության տարածքում քաղաքացիական, ծառայողական, ինչպես նաև ձեռքի մարտական հրաձգային և մարտական սառը զենքի շրջանառության ժամանակ ծագող հարաբերությունները կարգավորվում են «Զենքի մասին» Հայաստանի Հանրապետության օրենքով:
«Զենքի մասին» Հայաստանի Հանրապետության օրենքի 13-րդ հոդվածը սահմանում է այն սուբյեկտների ցանկը, ովքեր չեն կարող ստանալ ձեռք բերելու թույլտվություն:
Քաղաքացիական զենք ձեռք բերելու թույլտվություն չի տրվում`
– 18 տարին չլրացած քաղաքացուն.
– զենքի տիրապետմանը խոչնդոտող հիվանդությունների բացակայության մասին բժշկական եզրակացություն չներկայացնողներին.
– դիտավորյալ հանցագործություն կատարելու համար դատապարտված անձանց, որոնց դատվածությունն օրենքով սահմանված կարգով չի մարվել.
– հանցագործություն կատարելու համար պատիժ կրողներին.
– մշտական բնակության վայր չունեցողներին.
– զենքի հետ անվտանգ վարվելու կանոնների իմացության շուրջ ստուգում անցնելու փաստը հաստատող, ինչպես նաև սույն օրենքով նախատեսված այլ անհրաժեշտ փաստաթղթեր չներկայացնողներին:
