ՀՀ Քննչական կոմիտեի տեղեկատվության և հասարակայնության հետ կապերի բաժինը հաղորդում է, որ ՀՀ քննչական կոմիտեի Լոռու մարզային քննչական վարչության վարույթում քննվող քրեական գործով բացահայտվել է Վանաձոր քաղաքի բնակիչ Հ.Մարգարյանին ծանր մարմնական վնաս պատճառելու հանգամանքները։
2014 թվականի դեկտեմբերի 28-ին` ժամը 21:10-ին, «Վանաձոր բժշկական կենտրոն» ՓԲ ընկերության ընդունարանից ոստիկանության Վանաձոր քաղաքի Բազումի բաժին ահազանգ է ստացվել, որ նույն օրը ծակած -կտրած վերքերով հիվանդանոց է ընդունվել Վանաձոր քաղաքի բնակիչ Հույրաթ Մարգարյանը:
Նյութերի նախապատրաստման ընթացքում պարզվել է, որ քաղաքացուն ծանր մարմնական վնասվածք է պատճառվել 2014 թվականի դեկտեմբերի 28-ին` ժամը 20-ի սահմաններում, Վանաձոր քաղաքի Նաիրի փողոցի վերջնամասում գտնվող Հայրենական մեծ պատերազմի զոհերի հիշատակին նվիրված հուշակոթողի մոտ տեղի ունեցած վիճաբանության ժամանակ։ Առերեւույթ հանցանք կատարած անձը մարմնական վնասվածք պատճառելու դիտավորությամբ դանակով բազմաթիվ հարվածներ է հասցրել նրա թիկունքին, գլխին, պարանոցին, ձեռքերին:
Դեպքի առթիվ 2015 թվականի հունվարի 07-ին ՀՀ քննչական կոմիտեի Լոռու մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 112-րդ հոդվածի 1-ին մասով:
Առերեւույթ հանցանք կատարած անձի ինքնությունը պարզվել է, եւ նրան մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով։ Նրա նկատմամբ որպես խափանման միջոց է ընտրվել կալանավորումը։
Նախաքննությունը շարունակվում է:
Դանակով հարվածներ է հասցրել գլխին. հարուցվել է քրեական գործ
