Սյունիքի մարզի Արավուս գյուղի հարակից հատվածից մոլորվելու արդյունքում ադրբեջանական տարածքում հայտնված երկու անչափահասները վերադարձվել են հայկական կողմին։ Այս մասին հայտնել է Տեղ համայնքի ղեկավար Դավիթ Ղուլունցը։
Ավելի վաղ Ազգային անվտանգության ծառայությունից հայտնել են, որ Սյունիքի մարզի երկու անչափահաս բնակիչներ մոլորվել են և հայտնվել Ադրբեջանի տարածքում:
«Ստացված տվյալների համաձայն՝ ՀՀ Սյունիքի մարզի Տեղ համայնքի բնակիչներ Կարեն Արմենի Ջհանգիրյանը (ծնված 27.06.2007թ.) և Անդրեյ Արմենի Գյագունցը (ծնված 13.01.2008թ.) 2025 թվականի հունիսի 6-ին՝ ժամը 01:20-ի սահմաններում, Սյունիքի մարզի Արավուս գյուղի հարակից հատվածում՝ տեղանքում մոլորվելու հետևանքով հայտնվել են Ադրբեջանի տարածքում։
Ձեռնարկվում են անհրաժեշտ բոլոր միջոցները՝ քաղաքացիների գտնվելու վայրը պարզելու և նրանց անվտանգ վերադարձն ապահովելու ուղղությամբ»,-հայտնել են գերատեսչությունից։
