Ադրբեջանը բարձրացնում է 8 գյուղի հարց, մենք էլ մեր հերթին 8 գյուղի խնդիր ունենք, որովհետև Տավուշի մարզում մենք ունենք Ադրբեջանի կողմից օկուպացված տարածքներ Բերքաբեր, Վազաշեն, Այգեհովիտ, Պառավաքար և այլ գյուղերում: Այս հայտարարությունն արեց ՀՀ վարչապետ Նիկոլ Փաշինյանը Հանրային հեռուստաընկերության եթերում`անդրադառնալով Ադրբեջանի նախագահ Ալիևի կողմից Հայաստանի նկատմամբ ունեցած տարածքային պահանջներին։
Փաշինյանը հիշեցրել է իր առաջարկը՝ որոշել՝ որ քարտեզով դելիմիտացիա անել ու ըստ այդմ՝ «սահմանի գծից զորքերը հետ քաշել»։
«Փորձը ցույց է տալիս, որ լուծման ռելսերի վրա չդրված ցանկացած հարց «իքս» պահին դառնալու է ռազմական էսկալացիայի առիթ։ Այդ թեման մենք այդպես ենք հասցեագրում»,- նշել է նա։
Վարչապետն ընդգծել է՝ ամբողջ խնդիրն այն է, որ մինչև այսօր Ադրբեջանի նախագահը հրապարակայնորեն չի ասել՝ ճանաչում է ՀՀ տարածքային ամբողջականությունը 29,800 քկմ-ով:
