Արցախը 271 օր է շրջափակման մեջ է։
Հացի հարցը մնում է օրախնդիր։ Հայտնում են Արցախի տեղեկատվական շտաբից։
Գյուղի և գյուղատնտեսության աջակցության հիմնադրամը փորձում է մոբիլիզացնել եղած հնարավորությունները, որպեսզի հնարավոր լինի բաժանված կտրոնների սպասարկումն իրականացնել գոնե նվազագույն չափով: Չնայած ջանքերին՝ ցորենի և վառելիքի պաշարների սղության պատճառով հացը արտադրվում և մատակարարվում է զգալիորեն նվազ ծավալով:
Ստեփանակերտի մանկապարտեզները շարունակում են մնալ փակ
Ստեփանակերտում պետական մանկապարտեզները մնում են փակ: Ընդ որում, դեռ հնարավոր չէ կանխատեսել, թե երբ հնարավոր կլինի վերսկսել աշխատանքը: Միակ պատճառը սննդի բացակայությունն է: Օգոստոսին հազիվ են դիմացել՝ վերջին հնարավորություններով: Շրջաններում մանկապարտեզները դեռ շարունակում են աշխատել, քանի որ տեղում հնարավոր է ինչ-որ կերպ պարեն հայթայթել ու մանկապարտեզներին մատակարարել:
Վերջին շրջանում Ադրբեջանի ՊՆ-ն զգալիորեն ավելացրել է ստահոդ հաղորդագրությունների հրապարակման հաճախականությունը, ինչին զուգահեռ իրականացվում են անձնակազմի, սպառազինության և ռազմական տեխնիկայի տեղաշարժեր և կուտակումներ։
Ակնհայտ է, որ նման գործողություններով ադրբեջանական կողմը տեղեկատվական հենք է նախապատրաստում հերթական սադրանքի համար։
Փետրվարի 22-ին Արդարադատության միջազգային դատարանը հրապարակել է Հայաստանի ներկայացրած պահանջի վերաբերյալ որոշումը ու փաստել․ «Դեկտեմբերի 12-ից կապը Լաչինի միջանցքով խաթարված է, խոչընդոտվել է Լեռնային Ղարաբաղ սննդամթերքի, դեղորայքի և անհրաժեշտ այլ ապրանքների մատակարարումը ինչն անուղղելի վնաս կարող է պատճառել․
«Դատարանը համարում է, որ ժամանակավոր միջոց կիրառելն անհրաժեշտ է, դատարանն արձանագրում է, որ Ադրբեջանը պարտավոր է ձեռնարկել իրենով պայմանավորված միջոցները Լաչինի միջանցքով մարդկանց ու բեռների անխափան շարժը երկու ուղղությամբ ապահովելու համար»,-ասվում է դատարանի որոշման մեջ։
Սակայն փաստն այն է, որ ճանապարհը դեռ փակ է։
Ադրբեջանի վրա միջազգային ճնշումների բացակայության պատճառով արցախահայությունը կանգնած է հումանիտար աղետի առաջ։ Միջազգային հանրության անատամ կոչերը մինչև այս պահն անտեսվել են Ադրբեջանի ղեկավարության կողմից։
Արդեն 271 օր է խախտվում են մարդու հիմնարար իրավունքները, իսկ միջազգային կազմակերպությունները և պետությունները լուռ են։
Ադրբեջանական կողմից ահաբեկչական վարքագծի պատճառով Շուշիի շրջանի գյուղերը ամբողջությամբ կտրված են Արցախի մայրաքաղաքից ու մյուս բնակավայրերից:
Նշենք, որ հայտարարությամբ է հանդես եկել նաև Հայաստանի ՔՀԿ-ների հակակոռուպցիոն կոալիցիայի կառավարման խորհուրդը․ «Այդ շրջափակումը բնապահպանական քողի տակ հետապնդում է Ադրբեջանի բռնատիրական ղեկավարության կոռուպցիոն նկրտումների իրացումը՝ տիրանալու Արցախի տնտեսության կարևորագույն հարստություններին»:
Լուսանկարը՝ Դավիթ Ղահրամանյանի։
