Սեպտեմբերի 26-ին Նյու Յորքում` ՄԱԿ ԳԱ 80-րդ նստաշրջանի շրջանակներում, ՀՀ ԱԳ նախարարի տեղակալ Ռոբերտ Աբիսողոմոնյանը հանդիպել է ՄԱԿ գլխավոր քարտուղարի տեղակալ, ՄԱԿ Բնակչության հիմնադրամի գործադիր տնօրեն Դայեն Քեյթայի հետ:
Այս մասին Iravaban.net-ը տեղեկանում է Արտաքին գործերի նախարարությունից։
Երկուստեք ընդգծվել է Հայաստանի և ՄԱԿ Բնակչության հիմնադրամի միջև ձևավորված արդյունավետ համագործակցության խորացման կարևորությունը, այդ թվում՝ գենդերային հավասարության, սեռական և վերարտադրողական առողջության, երիտասարդության հզորացման, ինչպես նաև դեմոգրաֆիական խնդիրների հասցեագրման ոլորտներում:
ՀՀ ԱԳ նախարարի տեղակալն անդրադարձել է 2026-2030թթ. համար ՄԱԿ Բնակչության հիմնադրամի՝ երկրի ծրագրային փաստաթղթին՝ կարևորելով, որ դրանում արտացոլված ծրագրերը լիովին համահունչ են ՀՀ կառավարության տեսլականին։ ԱԳ նախարարի տեղակալը, մասնավորապես, ընդգծել է խոցելի խմբերի, այդ թվում՝ փախստականների և հաշմանդամների իրավունքների պաշտպանության և ներառականության ապահովման կարևորությունը:
Անդրադարձ է կատարվել նաև երկրի ծրագրային փաստաթղթի կյանքի կոչման համար համապատասխան ֆինանսավորման և այս ուղղությամբ դոնորների հետ համակարգված փոխգործակցության ապահովման կարևորությանը:
