Էրեբունի և Նուբարաշեն վարչական շրջանների ընդհանուր իրավասության դատարանում քննության է առնվում Վարդան Մոսոյանի դեմ հարուցված քրեական գործը:
Ինչպես հաղորդում է դատական տեղեկատվական համակարգը, Վարդան Մոսոյանին մեղադրանք է առաջադրվել այն բանի համար, որ նա 2013թ. մարտի 11-ին` ժամը 14:00-ի սահմաններում, տեսնելով փողոցում միայնակ քայլող իր ծանոթ Սրբուհի Հովնանյանին, վերջինիս առևանգելու նպատակով իր տրամադրության տակ գտնվող Վազ 2106 մակնիշի ավտոմեքենայից վերցրել է պտուտակահանը, այն սեղմել Սրբուհի Հովնանյանի մեջքին` որպես զենք, բռնություն գործադրելով և բռնություն գործադրելու սպառնալիքով վերջինիս կամքին հակառակ նստեցրել է ավտոմեքենան, նրան ծեծի ենթարկելով տեղափոխել է Նուբարաշեն X փողոցի X հասցեի մոտակայքում գտնվող ամայի տարածք և ավտոմեքենայի սրահում Սրբուհի Հովնանյանի կամքին հակառակ, բռնություն գործադրելով և սպառնալիքներ հասցնելով` սեռական հարաբերություն է ունեցել նրա հետ:
Գործով մեղադրյալ Վարդան Մոսոյանի նկատմամբ որպես խափանման միջոց ընտրվել է կալանավորում: Նրան մեղադրանք է առաջադրվել ՀՀ քրեական օրենսգրքի 131-րդ հոդվածի 2-րդ մասի 3-րդ կետի և 138-րդ հոդվածի 1-ին մասի հատկանիշներով, ըստ որոնց`
Խաբեության, վստահությունը չարաշահելու, բռնության կամ բռնություն գործադրելու սպառնալիքի միջոցով մարդուն գաղտնի կամ բացահայտ առևանգելը, որը կատարվել է զենքի կամ որպես զենք օգտագործվող առարկաների գործադրմամբ, եթե բացակայում են ՀՀ քրեական օրենսգրքի 218-րդ հոդվածով նախատեսված հանցագործության հատկանիշները՝ պատժվում է ազատազրկմամբ՝ պատժվում է ազատազրկմամբ՝ չորսից ութ տարի ժամկետով (131-րդ հոդվածի 2-րդ մասի 3-րդ կետ):
Բռնաբարությունը՝ տղամարդու սեռական հարաբերությունը կնոջ հետ՝ նրա կամքին հակառակ, վերջինիս կամ այլ անձի նկատմամբ բռնություն գործադրելով կամ դա գործադրելու սպառնալիքով կամ կնոջ անօգնական վիճակն օգտագործելով՝ պատժվում է ազատազրկմամբ՝ երեքից վեց տարի ժամկետով (138-րդ հոդվածի 1-ին մաս):
Իրավաբան.net-ում դատական գործերով անցնող անձանց անունները հասկանալի պատճառով ներկայացվում են փոխված:
Ծանուցում. Հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
