«Սուրմալուում» տեղի ունեցած պայթյունի հետևանքով մահացած 16 քաղաքացիներից 13-ի ինքնությունը պարզվել է։
Այս մասին լրագրողների հետ զրույցում ասաց Արտակարգ իրավիճակների նախարարության մամուլի խոսնակ Հայկ Կոստանյանը։
«13-ի ցանկում են նաև հղի կինը և երեխան։
Այս պահին անհետ կորածների թիվը 10-ն է»,-ասաց նա։
Բոլոր զոհերը եղել են ՀՀ քաղաքացիներ։ Հայկ Կոստանյանի խոսքով՝ տեղում աշխատում են շուրջ 100 փրկարարներ, նրանց հետ են նաև Կարմիր խաչի և «ՈՄԱ» հասարակական կազմակերպության կամավորները։
«Փլուզման վտանգ առաջին իսկ վայրկյանից եղել է, դրա համար իրականացրել ենք անվտանգության տեսանկյունից որոշակի գործողություններ, որպեսզի ապահովենք թե՛ փրկարարներին, թե՛ այն աշխատակիցներին, որոնք ներգրավված են աշխատանքներում»,-ասաց նա։
ԱԻՆ մամուլի խոսնակի խոսքով՝ կառավարության որոշմամբ սգո օր կհայտարարվի։
—————
Հիշեցնենք, որ օգոստոսի 14-ին, ժամը 13։23-ին Ճգնաժամային կառավարման ազգային կենտրոն ահազանգ է ստացվել, որ Երևանի Արշակունյաց 15 հասցեում գտնվող «Սուրմալու» առևտրի կենտրոնում տեղի է ունեցել պայթյուն՝ հրդեհի բռնկմամբ, ինչի հետևանքով եռհարկանի շինությունը մասնակի փլուզվել է։
