«Դուք սխալ եք ընկալել նախագահի հայտարարությունը, որ ևս մեկ անգամ ընթերցեք՝ կհասկանաք, որ ոչ մի ռիսկ էլ չկա»,-այս մասին լրագրողների հետ ճեպազրույցում ասաց Ազգային ժողովի պատգամավոր Անդրանիկ Քոչարյանը:

Նա նշեց, որ իր համար սպասելի չէր նախագահի հրաժարականը:

«Պատասխանը դուք պետք է ստանաք դեռևս նախագահի պաշտոնը զբաղեցնող Արմեն Սարգսյանից: Հայտարարության տեքստը պետք է ուշադիր կարդաք, այնտեղ նշել է խնդիրները: Ես կարծում եմ, որ սկսած առողջականից, մինչև ընտանեկան խնդիրներ, կարող են դեր ունենալ նրա հրաժարականի մեջ, որովհետև սա 3-րդ անգամն է, որ պարոն Սարգսյանը նման փորձառություն է ունեցել»,-ասաց նա:

Անդրադառնալով նախագահ Արմեն Սարգսյանի 4 տարիների պաշտոնավարմանը, նա նշեց, որ դրանք համընկել են ճգնաժամային տարիների հետ և ըստ Անդրանիկ Քոչարյանի՝ եղել են շառ ռիսկային պահեր, հատկապես Զինված ուժերում կադրային փոփոխությունների ժամանակ:

Հիշեցնեք, որ հունվարի 23-ին նախագահ Արմեն սարգսյանը հայտարարություն տարածեց, որ հրաժարական է տալիս ՀՀ նախագահի պաշտոնից:

Իրավաբան․net-ը հայտնում է, որ Սահմանադրության 142-րդ հոդվածի համաձայն՝ Հանրապետության նախագահն իր հրաժարականը ներկայացնում է Ազգային ժողով: Հրաժարականը համարվում է ընդունված օրենքով սահմանված կարգով այն հրապարակելու պահից:

144-րդ հոդվածի համաձայն՝ Հանրապետության նախագահի պաշտոնանկության, լիազորությունների կատարման անհնարինության, հրաժարականի կամ մահվան դեպքերում մինչև նորընտիր Հանրապետության նախագահի կողմից պաշտոնի ստանձնումը Հանրապետության նախագահի լիազորությունները կատարում է Ազգային ժողովի նախագահը:

Նշենք, որ նոր նախագահը ընտրվելու է Ազգային ժողովի կողմից: Նախագահի թեկնածու առաջադրելու իրավունք ունի պատգամավորների ընդհանուր թվի առնվազն մեկ քառորդը։ Հանրապետության նախագահ է ընտրվում այն թեկնածուն, որը ստացել է պատգամավորների ընդհանուր թվի ձայների առնվազն երեք քառորդը: Եթե Հանրապետության նախագահ չի ընտրվում, ապա անցկացվում է ընտրության երկրորդ փուլ, որին կարող են մասնակցել առաջին փուլին մասնակցած բոլոր թեկնածուները:

Երկրորդ փուլում Հանրապետության նախագահ է ընտրվում այն թեկնածուն, որն ստացել է պատգամավորների ընդհանուր թվի ձայների առնվազն երեք հինգերորդը: Եթե Հանրապետության նախագահ չի ընտրվում, ապա անցկացվում է ընտրության երրորդ փուլ, որին կարող են մասնակցել երկրորդ փուլում առավել ձայներ ստացած երկու թեկնածուները: Երրորդ փուլում Հանրապետության նախագահ է ընտրվում այն թեկնածուն, որն ստանում է պատգամավորների ընդհանուր թվի ձայների մեծամասնությունը:

Եթե Հանրապետության նախագահ չի ընտրվում, ապա տասնօրյա ժամկետում անցկացվում է Հանրապետության նախագահի նոր ընտրություն:

Արտահերթ ընտրության միջոցով ընտրված Հանրապետության նախագահը պաշտոնը ստանձնում է ընտրվելուց հետո՝ տասներորդ օրը:

Հանրապետության նախագահը պաշտոնը ստանձնում է Ազգային ժողովի հատուկ նիստում, ժողովրդին տրված հետևյալ երդմամբ. «Ստանձնելով Հանրապետության նախագահի պաշտոնը՝ երդվում եմ. հավատարիմ լինել Հայաստանի Հանրապետության Սահմանադրությանը, իմ լիազորություններն իրականացնելիս լինել անաչառ, առաջնորդվել միայն համապետական ու համազգային շահերով և իմ ողջ ուժը ներդնել ազգային միասնության ամրապնդման գործում»:

Հանրապետության նախագահն իր իրավասության մեջ մտնող հարցերի վերաբերյալ կարող է ուղերձ հղել Ազգային ժողովին: