Հունիսի 16-ին, ժամը 03.30–ին, ոստիկանության Երևան քաղաքի վարչությունից Էրեբունու բաժնում հաղորդում էր ստացվել, որ իրենց է զանգահարել Նուբարաշենի 9-րդ փողոցի մի բնակչուհի և հայտնել, որ սպորտային համազգեստով մի երիտասարդ մտել է իրենց տուն և տեսնելով, որ տանը մարդ կա՝ դիմել է փախուստի:

Ինչպես տեղեկացնում են ոստիկանությունից, մեկնած օպերատիվ խումբը պարզել է, որ նույն օրը, ժամը 03.20-ին, անհայտ անձը բաց դռնից մուտք գործելով նշված տուն՝ գողացել է ճնշման սարք, չորս զույգ գուլպա, արևային ակնոց, մեկ տուփ անձեռոցիկ և մեկ տուփ «Ինդոմետազին» քսուք: Տան բնակիչների արթնանալու և տանտիրուհուն տեսնելուց հետո՝ անծանոթը նշված իրերը գցել է տան բակում և դիմել փախուստի:

Ոստիկանության Երևան քաղաքի վարչության ՊՊԾ գնդի 1-ին վաշտի և Նուբարաշենի բաժանմունքի ծառայողների ձեռնարկած օպերատիվ-հետախուզական միջոցառումների շնորհիվ՝ հանցագործությունը կատարելու կասկածանքով Նուբարաշենի բաժանմունք բերման է ենթարկվել 1965 թ. ծնված, նախկինում 4 անգամ դատված Արթուր Օ.-ն: Նա խոստովանել է, որ նշված հանցագործությունը կատարել է ինքը: Արթուր Օ.-ն ձերբակալված է: Կատարվում է նախաքննություն:

Ծանուցում. Հանցագործության մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Իրավաբան.net