Եվրոպական միությունը և ԱՀԿ-ն այսօր՝ սեպտեմբերի 8-ին, ՀՀ առողջապահության նախարարությանն են փոխանցել 100 թթվածնի խտացուցիչ, 20 էլեկտրասրտագրության սարք և 10․000 ՊՇՌ թեստ՝ COVID-19-ի ախտորոշման համար:
Այս մասին տեղեկացնում է Առողջապահության համաշխարհային կազմակերպության ռիսկերի հաղորդակցության խորհրդատու Անժելա Կժդրյանը։
«Եվրամիություն-Առողջապահության համաշխարհային կազմակերպություն-Առողջապահության նախարարություն համագործակցության շրջանակում Հայաստան առաքված թթվածնի խտացուցիչները COVID-19-ով հոսպիտալացված հիվանդներին թթվածնով ապահովելու ոչ ինվազիվ միջոց են: Նման հավելյալ թթվածինն առաջին անհրաժեշտ քայլն է COVID-19-ի ծանր ընթացքի դեպքում արյան մեջ թթվածնի ցածր մակարդակ ունեցող հիվանդների բուժման համար:
Էլեկտրասրտագրության սարքն օգնում է բուժաշխատողներին լսել հիվանդի սիրտը և հետևել, որ բարդություններ չառաջանան:
10,000 թեստերը կապահովեն հիվանդների ժամանակին հայտնաբերում, մեկուսացում և կառավարում, ինչը կարևոր է ինչպես հիվանդների խնամքի, այնպես էլ երկրում համաճարակի զսպման համար»։
