Անի համայնքի կողմից 2019 թվականի ներկայացված «Հակակարկտային կայանների ձեռքբերում» սուբվենցիայի ծրագրի շրջանակներում այս տարի արդեն տեղադրվել են 20 հակակարկտային կայաններ:

Այս մասին տեղեկացնում են Շիրակի մարզպետարանից։

Լանջիկ, Ձիթհանքով, Քարաբերդ, Ձորակապ, Մարալիկ, Գուսանագյուղ, Շիրակավան, Լույսաղբյուր, Իսահակյան, Աղին, Ջրափի, Հայկաձոր, Բագրավան, Անիավան, Անիպեմզա բնակավայրերում հակակարկտային կայանների տեղադրման ծրագրի ընդհանուր արժեքը 55 մլն 560 հազար դրամ է, որի 55 տոկոսը՝ 30 մլն 560 հազար դրամը տրամադրել է պետությունը, 45 տոկոսը՝ համայնքը։ Հակակարկտային կայանների տեղադրմամբ 2000-3000 հա ցանքատարածությունների մշակումն առավել անվտանգ է դառնալու, այնինչ վերջին տարիներին տարբեր բնակավայրերում կարկուտից գյուղատնտեսությանը հասցված վնասը գնահատվում է շուրջ 145 մլն դրամ: Ծրագրի շահառուներն են շուրջ 2500 գյուղացիական տնտեսություններ և ֆերմերներ։