Էկոնոմիկայի նախարար Տիգրան Խաչատրյանն այսօր` օգոստոսի 15-ին, կառավարության նիստին կներկայացնի մարդու կյանքին և շրջակա միջավայրին վտանգ սպառնացող (վտանգավոր նյութեր պարունակող) էներգաարդյունավետ սարքերի, սարքվածքների և արտադրանքի ցանկը սահմանելու մասին որոշման նախագիծը:
«Էներգախնայողության և վերականգնվող էներգետիկայի մասին» օրենքի համաձայն, նախատեսվում է սահմանել մարդու կյանքին և (կամ) շրջակա միջավայրին վտանգ սպառնացող (վտանգավոր նյութեր պարունակող) էներգաարդյունավետ սարքերի, սարքվածքների և արտադրանքի ցանկը:
Հաշվի առնելով այն, որ էլեկտրատեխնիկայի և ռադիոէլեկտրոնիկայի արտադրատեսակների մեջ էներգաարդյունավետության բարձր ցուցանիշների ստացման նպատակով օգտագործվում են վտանգավոր նյութեր, անհրաժեշտություն է առաջացել ապահովել դրանց հետևելիությունը՝ հստակ սահմանելով այդ սարքերի և սարքվածքների ցանկը`
- Հեռուստացույց (որը պարունակում է սնդիկի և կապարի պարունակությամբ բաղադրանյութեր)
- Սառնարան/սառցարան, սառցարան (որոնք պարունակում են օզոնային շերտը քայքայող նյութեր, այդ թվում՝ խառնուրդներ, ինչպես նաև հիդրոֆտորածխածիններ)
- Օդորակիչներ ու օդակարգավորման այլ սարքավորումներ (որոնք պարունակում են օզոնային շերտը քայքայող նյութեր, այդ թվում՝ խառնուրդներ, ինչպես նաև հիդրոֆտորածխածիններ)
- Վոլֆրամային հալոգենային լամպեր
- Լյումինեսցենտային երկցոկոլ և միացոկոլ կոմպակտ (ԿԼԼ) լամպեր
- Սնդիկի պարունակությամբ գազապարպման էլեկտրական լամպեր
- Բարձր և ցածր ճնշման նատրիումային գազապարպման լամպեր
- Հալոիդներ և այլ գազեր պարունակող գազապարպման լամպեր:
Ակնկալվում է, որ նախագծով կսահմանվեն առավել տարածված, վտանգավոր նյութեր պարունակող էներգաարդյունավետ սարքավորումներ և կլինի ցանկում ներառված արտադրանքի նկատմամբ համապատասխան աշխատակարգի ընդունում:
