Կառավարությունը այսօր՝ հուլիսի 4-ին, հավանություն կտա «Հայաստանի Հանրապետության կառավարության և Սինգապուրի Հանրապետության կառավարության միջև եկամուտների կրկնակի հարկումը բացառելու և հարկերի վճարումից խուսափելը կանխելու մասին» համաձայնագրի ստորագրման առաջարկությանը:
Պետությունների միջև կնքվող եկամուտների կրկնակի հարկումը բացառելու մասին համաձայնագրերը կարգավորում են պայմանավորվող պետությունների միջև առևտրատնտեսական հարաբերություններում առաջացող հարկային հարցերը: Այդ առումով, նմանատիպ համաձայնագրերը նշանակալի ազդեցություն են ունենում պետությունների կողմից իրականացվող արտաքին տնտեսական քաղաքականության վրա:
Համաձայնագրի ստորագրմամբ հնարավոր կլինի՝
- բացառել Հայաստանի Հանրապետության և Սինգապուրի միջև եկամուտների և գույքի կրկնակի հարկումը, ինչը հնարավորություն կտա խրախուսել ձեռնարկատիրական գործունեությունը պայմանավորվող պետություններում` ստեղծելով նպաստավոր մրցակցային պայմաններ,
- խթանել ներդրումների հոսքը` օտարերկրյա ներդրումների համար ստեղծելով բարենպաստ հարկային ռեժիմ,
- ստեղծել կանխատեսելի և կայուն հարկային դաշտ սինգապուրյան ներդրողների համար:
Պետությունների միջև կնքվող եկամուտների և գույքի կրկնակի հարկումը բացառելու մասին համաձայնագրերը նախատեսում են նաև երկու պետությունների հարկային մարմինների միջև համագործակցության հաստատում: Այդ համագործակցությունը ներառում է կրկնակի հարկման և հարկային օրենքների կիրառման վերաբերյալ վիճելի հարցերի կարգավորման հնարավորություն, ինչպես նաև տեղեկատվության փոխանակում` հարկումից խուսափելը կանխելու նպատակով, ինչը հանդիսանում է արդյունավետ գործիք և հնարավորություն է տալիս համաձայնագրի դրույթների կատարման նկատմամբ իրականացնել համապատասխան հսկողություն:
Համաձայնագրի ստորագրումը հնարավորություն կընձեռի զարգացնել Հայաստանի Հանրապետության և Սինգապուրի միջև ապրանքների և ծառայությունների շրջանառությունը, կապիտալի, տեխնոլոգիաների, մարդկանց շարժը, կնպաստի տնտեսական կապերի զարգացմանը:
Այսպիսով, հաշվի առնելով վերոգրյալը, ինչպես նաև Հայաստանի Հանրապետության և Սինգապուրի միջև զարգացող առևտրատնտեսական հարաբերությունները՝ «Հայաստանի Հանրապետության և Սինգապուրի միջև՝ եկամուտների կրկնակի հարկումը բացառելու և հարկերի վճարումից խուսափելը կանխելու մասին» համաձայնագրի ստորագրումը համարում ենք նպատակահարմար:
