Աշխատանքի և սոցիալական հարցերի փոխնախարար Գեմաֆին Գասպարյանը հայտում է, որ նախարարությունը առաջարկելու է նվազագույն աշխատավարձը բարձրացնել մինչև 68,000 դրամ՝ պատգամավորների առաջարկած 63,000-ի փոխարեն. «Այս խնդիրը մեր օրակարգում է»:
Հիշեցնենք, որ Ազգային ժողովի «Իմ քայլը» խմբակցության պատգամավորներ Վարազդատ Կարապետյանն ու Բաբկեն Թունյանը շրջանառության մեջ են դրել «Նվազագույն ամսական աշխատավարձի մասին» օրենքում փոփոխություններ կատարելու նախագիծը:
Վերջիններս առաջարկում են նվազագույն աշխատավարձը 55 հազար դրամից դարձնել 63 հազար դրամ:
Պատգամավորները առաջարկում են գործավարձով և ժամավճարով վարձատրվող աշխատակիցների համար ժամային տարիֆային դրույքի նվազագույն չափը սահմանել ՝
1) աշխատաժամանակի նորմալ տևողության դեպքում (40-ժամյա աշխատանքային շաբաթ)՝ 390 դրամ.
2) աշխատաժամանակի կրճատ տևողության դեպքում (36-ժամյա աշխատանքային շաբաթ)՝ 435 դրամ.
3) աշխատաժամանակի կրճատ տևողության դեպքում (24-ժամյա աշխատանքային շաբաթ)՝ 650 դրամ:
Այն ընդգրկվել է կառավարության հերթական նիստի օրակարգ, սակայն ԱՍՀ նախարարությունը առաջարկել է այս փուլում ձեռնպահ մնալ նախագծի քննարկումներից և գործող օրենքի հոդվածները թողնել անփոփոխ:
