Մեկուսարանում գտնվող Մանվել Գրիգորյանին լուսանկարելու գործով Ազգային անվտանգության ծառայությունում նշանակվել էր ծառայողական քննություն։ Իրավաբան.net-ի հետ զրույցում Մանվել Գրիգորյանի պաշտպան Արսեն Մկրտչյանը հայտնեց, որ լուսանկարը Ազգային անվտանգության ծառայության ձերբակալվածների պահման վայրի աշխատակիցն է արել:
«Մանվել Գրիգորյանը որևէ բողոք կամ դիրքորոշում չի ունեցել դրա վերաբերյալ: Չի ցանկացել բողոքել»,-նշում է Մկրտչյանը:
Պաշտպանը նաև նշեց, որ Մանվել Գրիգորյանի առողջական վիճակը շարունակում է ծանր մնալ:
«Շաքարը անընդհատ բարձրանում է»,-նշեց նա:
Ավելի վաղ հայտնել էինք, որ «Հայկական ժամանակ» օրաթերթը հրապարակել էր ԱԺ պատգամավոր Մանվել Գրիգորյանի լուսանկարը՝ քրեակատարողական հիմնարկի խցում նստած:
Հիշեցնենք, որ ավելի վաղ ԱԱԾ պետը հայտնել էր, որ եթե պարզվի, որ աշխատակցի արարքը քրեորեն պատժելի է, նա կմեղադրվի, եթե քրեորեն պատժելի արարք չլինի, կհեռացվի աշխատանքից:
Նշենք, որ ԱԱԾ-ի կողմից իրականացված օպերատիվ-հետախուզական միջոցառումների արդյունքում տվյալներ են ստացվել այն մասին, որ ՀՀ ԱԺ պատգամավոր, ԵԿՄ նախագահ Մանվել Գրիգորյանը այլ անձանց հետ նախնական համաձայնությամբ ապօրինի կերպով ձեռք է բերել և պահում է զենք և ռազմամթերք:Դեպքի առթիվ ՀՀ ԱԱԾ քննչական վարչությունում հարուցվել է քրեական գործ ` ՀՀ քրեական օրենսգրքի 235-րդ հոդվածի 2-րդ մասի հատկանիշներով: Գործի շրջանակներում խուզարկություններ են իրականացվել Մանվել Գրիգորյանի տանը, ամառանոցում և նրան պատկանող այլ տարածքներում: Հայտնաբերվել է ապօրինի կերպով պահվող մեծ թվով զենք և ռազմամթերք:
ԱԺ պատգամավոր Մանվել Գրիգորյանը բերման է ենթարկվել և ձերբակալվել` ՀՀ քրեական օրենսգրքի 235-րդ հոդվածի 2-րդ մասով («Մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը») նախատեսված հանցագործություն կատարելու կասկածանքով: Հայաստանի Հանրապետության Սահմանադրության 96-րդ հոդվածով սահմանված կարգով, ԱԺ պատգամավորին ազատությունից զրկելու մասին անհապաղ տեղեկացվել է ՀՀ ԱԺ նախագահը:
