Իրավական ակտերի հրապարակման միասնական կայքում արդարադատության նախարարությունը նոր նախագիծ է ներկայացրել քրեական, վարչական իրավախախտումների վերաբերյալ օրենսգրքերում և «Ճանապարհային երթևեկության անվտանգության ապահովման մասին» օրենքում փոփոխություններ և լրացումներ կատարելու մասին:
Այսպիսով, քրեական օրենսգրքի 243.1-րդ հոդվածը կլրացվի նոր 4-րդ մասով.
«4. Անձը համարվում է տրանսպորտային միջոցներ վարելու իրավունքից զրկված, եթե նա օրենքով սահմանված կարգով զրկվել է տրանսպորտային միջոցներ վարելու իրավունքից և զրկման ժամկետը չի լրացել»:
Իսկ վարչական իրավախախտումների վերաբերյալ օրենսգրքում կատարված փոփոխության համաձայն՝ տրանսպորտային միջոցը կանգնեցնելու մասին ոստիկանության ծառայողի պահանջը վարորդների կողմից դիտավորյալ չկատարելու համար վարչական տույժի նշանակման և այդ օրվանից հետո` մեկ տարվա ընթացքում, նշված արարքը կրկին կատարելու համար վարորդը չի զրկվի վարորդական իրավունքից:
«Ճանապարհային երթևեկության անվտանգության ապահովման մասին» օրենքի 23-րդ հոդվածի 3-րդ մասն էլ լրացվել է հետևյալ բովանդակությամբ նախադասություն. «Ոստիկանության ծառայողի կողմից տրանսպորտային միջոցը կանգնեցնելուց հետո վարորդն ու ուղևորները ոստիկանության ծառայողի պահանջով պարտավոր են մնալ տրանսպորտային միջոցում, եթե ոստիկանության ծառայողը հայտարարում է, որ նրանք խոչընդոտում են ոստիկանության ծառայողի ծառայողական պարտականությունների կատարմանը:»:
