Միգրացիոն ծառայության պետ Գագիկ Եգանյանը այսօր կառավարությանը ներկայացրեց «Հայաստանի Հանրապետության կառավարության և Ֆրանսիայի Հանրապետության կառավարության միջև միգրացիոն ոլորտում համագործակցության վերաբերյալ» համաձայնագրի կնքման առաջարկությանը համաձայնություն տալու մասին նախագիծը: Նա ասաց, որ նախագծի համար հիմք է հանդիսացել Հայաստանի և Ֆրանսիայի կառավարությունների միջև կնքված համաձայնագիրը, որի  հիմնական նպատակն  է  իրավական հիմք  ապահովել  2011 թվականի հոկտեմբերի 27-ին ստորագրված «Հայաստանի Հանրապե­տության և Եվրոպական միության միջև շարժու­նակության շուրջ գործընկերության վերա­բերյալ» համատեղ հռչակագրով ամրագրված  մտադրությունների  իրականացման  համար:

Ըստ պարոն Եգանյանի` համաձայնագրի ստորագրումը   նոր  հնարավորություններ  կբացի   մեր այն ուսանողների, երիտասարդ մասնագետների  և  որակյալ մասնագետների  համար, ովքեր ցանկություն  ունեն  խորացնեու իրենց գիտելիքները, նոր  փորձ  և  հմտություններ ձեռք  բերելու  իրենց  մասնագիտական ասպարեզներում  Ֆրանսիայում ուսանելու  և  աշխատելու  միջոցով: Նա նաև հավելեց, որ  նման  ծրագրերը  միտված  են  ոչ  թե   այդ  անձանց  մշտական միգրացիային, այլ  հակառակը  պայմանը  վերադարձն  է հայրենիք:

Նախագիծը հաստատելուց հետո վարչապետ Հովիկ Աբրահամյանը հետաքրքրվեց, թե ինչ անձնագրով են Հայաստան գալիս Ռուսաստանի քաղաքացիները: Նա ասաց, որ ՌԴ քաղաքացիների մուտքը Հայաստան պետք է պարզեցնել, քանի որ այն ուղղակի կապված է բիզնես ոլորտի զարգացման հետ:

Պարոն Եգանյանը պարզաբանեց, որ գործընթացն ընանում է, այն նախատեսված է կյանքի կոչել Եվրասիական տնտեսական միության շրջանակներում:

Միգրացիոն ծառայության պետի պարզաբանումները չէին ավարտվել, երբ վարչապետն արձագանքեց. «Հարցը լուծենք, հարցը, թե չէ շատ ենք խոսում»:

Տեսանյութը` քիչ ուշ

Իրավաբան.net