Վերջին շրջանում քաղաքացիները դիմում են Իրավաբան.net-ի խմբագրություն և բողոքում, որ չեն կարողանում զանգահարել Ոստիկանության տեխնիկական սարքերով հայտնաբերված իրավախախտումների հարցերով բաժին: Նրանց խոսքով` համարը( (+374) 10 56-29-74), որը պաշտոնապես հրապարակված է ՀՀ ոստիկանության կայք էջում , ամբողջ օրվա ընթացքում անընդհատ զբաղված է կամ զանգերը գնալու դեպքում չեն պատասխանում:
Մեզ նույնպես չհաջողվեց միանալ այդ հեռախոսահամարին:
Խնդիրը փորձեցինք ճշտել Ոստիկանության Հասարակայնության և կապի բաժնից, որտեղից մեզ փոխանցեցին, որ տվյալ ստորաբաժանման համար գործում է մեկ հեռախոսահամար, իսկ ծանրաբեռնվածությունը շատ է. «Գիտեք ամբողջ հանրապետությունը այդ համարն է սպասարկում, իսկ զանգերն էլ շատ-շատ են: Նախկինում էլի ենք դժգոհություններ ստացել:Երկրորդ զանգ, որ գնում է, քաղաքացիներին թվում է, թե չեն պատասխանում, մինչդեռ նրանք գծի մեջ են լինում››,- ոստիկանությունից փոխանցեցին Իրավաբան.net-ին:
Մինդեռ Հայաստանի երիտասարդ իրավաբանների ասոցիացիայի իրավախորհրդատու Առնոլդ Վարդանյանի կարծիքով խախտվում են քաղացու իրավունքները. «Արդյունքում ոչ իրավաչափորեն սահմանափակվում է տեխնիկական սարքերով հայտնաբերված իրավախախտումների կապակցությամբ քաղաքացիների իրավաբանական օգնություն ստանալու մատչելիության իրավունքը››:
Ըստ Առնոլդ Վարդանյանի խնդիրը կստանա արդյունավետ լուծում , եթե ամբողջ Հանրապետությունում ավելացնեն թեժ գծի համարները:
Լաուրա Մամյան
