Երեք երեխաների հայր  Արմեն Կարապետյանը վերջերս  դիմել էր Հայաստանի երիտասարդ իրավաբանների ասոցացիա` իրավաբանական խորհրդատվություն ստանալու խնդրանքով:
Քաղաքացին, ում երեխաներից երկուսը չափահաս են, մեկը` անչափահաս, ցանկանում էր դատական հայց ներկայցնել նախկին կնոջ դեմ` երեխաների  համար ալիմենտ ստանալու պահանջով:

Իրավախորհրդատու Առնոլդ Վարդանյանը կազմել է հայցադիմում  և սույն թվականի մայիս ամսին այն ներկայացվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան: Դատարանը հայցը ընդունել էր վարույթ և նշանակել դատաքննություն։

«Օրենքի հետ կապված որոշ խնդիրներ ունեինք: Երկու երեխաները չափահաս էին, իսկ օրենքը սահմանում է, որ ալիմենտ կարող է տրվել միայն անաշխատունակ չափահասին, որը տառացիորեն նշանակում է աշխատելու ոչ իվիճակի: Համենայն դեպս մենք օրենքի այդ կետը ներառեցինք հայցադիմում››,-ասաց իրավախորհրդատուն

Արագացրած դատական քննություն նշանակելով` դատարանը կայացրեց դատական ակտ, որով մասնակիորեն բավարարեց հայցապահանջը. «Չափահասների առումով դատարանը մերժեց մեր հայցը  և բավարարեց միայն անչափահաս երեխայի մասով, մոր աշխատավարձի 1/4 – ի չափով››

Իրավախորհրդատու Առնոլդ Վարդնյանը Իրավաբան.net–ի հետ զրույցում ասաց, որ հայցադիմումի պահանջը իրենք ներկայացրել էին ոչ թե աշխատավարձի 1/4-ի չափով, այլ նվազագույն սպառողական զամբյուղի կեսի չափով .

«Նվազագույն աշխատավարձը 55 հազար է, իսկ նվազագույն զամբյուղը ամեն տարի կառավարության կողմից հաստատվում է և 2015թ.–ին կազմել է  60 հազար: Խնդիրն այն էր, որ մենք ալիմենտի չափը չէինք պայմանավորել պատասխանողի աշխատավարձի չափի հետ, քանի որ չգիտեինք էլ որքան է այդ կնոջ աշխատավարձը››:

Իրավախորհրդատուն առաջարկել է քաղաքացուն դիմել վերաքննիչ դատարան, մինչդեռ նա հրաժարվել է և բավարարվել ընդհանուր իրավասության դատարանի որոշումով` պատասխանողի աշխատավարձի 1/4–ի չափով, որը կազմում է 20 հազար դրամ:

Լաուրա Մամյան

(Հարգելի պատճառներով քաղաքացու  անունը փոխված է)