30-ամյա Վ.Ս-ն դատապարտվել է սակավամտության (օլիգոֆրենիա) խնդիր ունեցող և, դրա հետևանքով, իր հետ կատարվող գործողությունների ներքին բովանդակությունը հասկանալու ունակությունից զրկված աղջկա հետ սեռական հարաբերութուն ունենալու մեջ: Գործը քննել է Արմավիրի մարզի ընդհանուր իրավասության դատարանը` դատավոր Արթուր Ադամյանի նախագահությամբ:
Գործի նյութերի համաձայն` 2013 թվականին Վ.Ս-ն «Օդնիոկլասնիկի» սոցիալական կայքով ծանոթացել է Ալինա Վարդանյանի (անունը փոխված է) հետ և առաջարկել շփվել: Նա ընդունել է առաջարկը, տրամադրել է իր հեռախոսահամարը, որից հետո համաձայնվել է հանդիպել Վ.Ս-ի հետ: 2013թ. հոկտեմբերի 6-ին Վ.Ս-ն աղջկան մեքենայով տարել է ավտոկայանի պահակատուն, շփման ընթացքում հասկացել է, որ Ալինան հոգեկան խնդիրներ ունի, սակայն անտեսելով և օգտվելով նրա անօգնական վիճակից, պոմպակայանի պահակատանը բնական ճանապարհով սեռական հարաբերություն է ունեցել վերջինիս հետ:
Առաջին ատյանի դատարանը 2014 թվականի հոկտեմբերի 26-ին վճռել է Վ.Ս-ին ճանաչել մեղավոր ՀՀ քրեական օրենսգրքի 138 հոդվածի 1-ին մասով նախատեսված հանցանքում և նրան դատապարտել ազատազրկման 3 տարի ժամկետով, որը վերջինս պետք է կրի ՀՀ ԱՆ քրեակատարողական համապատասխան հիմնարկում: Սակայն ամբաստանյալի պաշտպան Հովհաննես Հարութունյանը դիմել է վերաքննիչ դատարան` պահանջելով բեկանել և փոփոխել Արմավիրի մարզի ընդհանուր իրավասության դատարանի դատավճիռը և կիրառել ՀՀ քր.օր. 70 հոդվածի դրույթները, որոշում կայացնել` պայմանականորեն չկիրառել սահմանված պատիժը: Վերաքննիչ դատարանը պաշտպանի վերաքննիչ բողոքը մերժել է:
Վերաքննիչ դատարանի որոշումը հրապարակվել է այս տարվա ապրիլին և վճռաբեկ բողոք չի տարվել: Այսինքն` մեղադրական դատական ակտը մտել է ուժի մեջ:
Լ. Մամյան
