2015 թվականի հուլիսի 6-ին ՀՀ փաստաբանների պալատի խորհուրդը քննելով քաղաքացի Էմմա Կիրակոսյանի դիմումի հիման վրա հարուցված թիվ ԿԳ-15021 կարգապահական գործը որոշել է կարգապահական պատասխանատվության ենթարկել ՀՀ փաստաբանների պալատի անդամ, փաստաբան Արմեն Ումրշատյանին: Այս մասին Իրավաբան.net-ը տեղեկանում է Փաստաբանների պալատից:
Փաստաբանը մեղավոր է ճանաչվել Փաստաբանի վարքագծի կանոնագրքի երեք կետերով խախտում կատարելու համար:
Առաջինը 2.7.2. կետն է, որով սահմանվում է, որ փաստաբանը պարտավոր է իր վստահորդին բարեխիղճ օգնություն ցույց տալ` իր մասնագիտական կարողությունների սահմաններում, երկրորդը` 3.1.8 կետն է, որի համաձայն, իրավական օգնություն ցույց տալու հանձնարարությունը չպետք է ընդունի, եթե զբաղվածության կամ որևէ այլ պատճառով չի կարող ապահովել հանձնարարության բարեխիղճ և ժամանակին կատարումը:
Եվ երրորդը` 3.5.5. կետն է, որի համաձայն, փաստաբանը պարտավոր է ժամանակին գիտակցաբար և ջանասիրաբար խորհուրդ տալ և պաշտպանել իր վստայհորդին և հանդես գալ նրա անունից:
Այս խախտումների համար որպես տույժ փաստաբանների պալատի խորհուրդը որոշել է դադարեցնել փաստաբան Արմեն Ումրշատյանի թիվ 385 արտոնագրի գործողությունը:
Ծանոթություն։ Փաստաբանների պալատի խորհրդի որոշումը կարող է բողոքարկվել դատական կարգով’ այն ստանալու օրվանից մեկամսյա ժամկետում: Որոշումը օրինական ուժի մեջ է մտնում բողոքարկման ժամկետն անցնելուց հետո:
