ՀՀ ԱԺ Հասարակայնության հետ կապերի և լրատվության վարչության հաղորդմամբ՝ օգոստոսի 26-ին Կանադայի խորհրդարանական պատվիրակությունը Ազգային ժողովում հանդիպել է ՀՀ ԱԺ Հայաստան-Կանադա բարեկամական խմբի անդամների հետ:
Ողջունելով հյուրերին՝ խմբի ղեկավար Հովհաննես Սահակյանը նշեց, որ հայ-կանադական հարաբերությունները երկար տարիների պատմություն ունեն եւ բնորոշվում են որպես ջերմ-բարեկամական ու գործընկերային: Հյուրերի խնդրանքով Հովհաննես Սահակյանն անդրադարձավ հայ-թուրքական հարաբերությունների կարգավորմանն ուղղված արձանագրություններին եւ Թուրքիայի ժխտողական քաղաքականությանը: Նա ընդգծեց, որ հայ-թուրքական հարաբերությունների կարգավորման գործընթացում Թուրքիան նախապայմաններ է առաջադրում, որոնք Հայաստանի համար անընդունելի են: Անդրադարձ կատարելով Հայոց ցեղասպանության միջազգային ճանաչման խնդրին՝ խմբի ղեկավարը կարեւորեց Հայոց ցեղասպանության ճանաչումն ու դատապարտումը, ինչը հնարավորություն կտա բացառել նոր ցեղասպանությունների իրականացումը: Բարեկամական խմբի անդամները նշեցին, որ 2009 թ. հայ-թուրքական արձանագրությունները սառեցվել են Թուրքիայի ղեկավարության կողմից: Խմբի անդամները, անդրադառնալով Հայաստանի շրջափակմանը, կարծիք հայտնեցին, որ 21-րդ դարում փակ սահմաններ չպետք է լինեն: Հովհաննես Սահակյանն անդրադարձավ վերջին շրջանում ԼՂ ու Ադրբեջանի միջեւ շփման գծի եւ հայ-ադրբեջանական սահմանի ամբողջ երկայնքով զինադադարի ռեժիմի բազմակի խախտումներին եւ ադրբեջանական զինուժի կողմից սադրիչ-դիվերսիոն գործողությունների աճին:
Հանդիպման ընթացքում անդրադարձ կատարվեց նաեւ Հայաստանի՝ Եվրասիական տնտեսական միությանն անդամակցելու գործընթացին, Հայաստան-ԵՄ հետագա համագործակցության զարգացման անհրաժեշտությանը, տարածաշրջանային եւ աշխարհաքաղաքական խնդիրներին:
Նույն օրը Կանադայի խորհրդարանականների պատվիրակությունը այցելեց Ծիծեռնակաբերդի Հայոց ցեղասպանության հուշահամալիր:
Կանադացի խորհրդարանականները ծաղիկներ դրեցին 1915 թվականի Հայոց ցեղասպանության հուշակոթողին եւ լռությամբ ու խոնարհումով հարգեցին մեկուկես միլիոն անմեղ զոհերի հիշատակը: Հյուրերը եղան Հայոց ցեղասպանության թանգարան-ինստիտուտում, դիտեցին ցուցանմուշները:
Լուսանկարը՝ parliament.am-ի:
