Հայաստանը չի կարող տոլերանտ լինել այնպիսի բովանդակություն ունեցող հաղորդումների նկատմամբ, որոնք կարող են հարցականի տակ դնել մեր ժողովրդի արժանապատվությունը։ Այս մասին ԱԺ-ում հայտարարեց ԲՏԱ նախարար Մխիթար Հայրապետյանը՝ պատասխանելով «Քաղաքացիական պայմանագիր» խմբակցության պատգամավոր Արմեն Խաչատրյանին։
Հայրապետյանի խոսքով՝ ռուսական կողմից խախտումները կրկնվում են եթերում, ինչը ՀՀ-ՌԴ միջպետական համաձայնագիրը լրամշակելու կամ խմբագրելու անհրաժեշտության վկայություն է։
Մխիթարյանը նշեց նաև՝ փետրվարի 26-ին Հայաստանի հեռուստատեսության և ռադիոյի հանձնաժողովի կողմից գրություն են ստացել՝ խախտումների մասին արձանագրություն։
«ԲՏԱ-ն արձանագրել է, որ իրապես խախտումները տեղի են ունեցել։ Այսօր ՀՀ ԱԳՆ-ն բողոքի հայտագիր է հղել ռուս գործընկերներին։ Զգայուն է հարցը, պետք է առիթ չտալ, որ տարատեսակ խմբերի կողմից հարցը քաղաքականցվի, անիմաստ է փնտրել քաղաքական ենթատեքստեր»,-ասաց Հայրապետյանը և հավելեց, որ ինքը ևս նամակ է ուղարկել ՌԴ Կապի և զարգացման նախարարին՝ առաջարկելով անհապաղ քննարկումներ անցկացնել։
Նա ընդգծեց, որ քաղաքական կոռեկտությունից ելնելով՝ ճիշտ չի համարում խոսել նամակի բովանդակության մասին, բայց պետք է անհապաղ խորհրդակցություններ անցկացնել և ներկայացնել լուծումների մասին պատկերացումները։
