2023–ի բառն «ապրումակցում»–ն է։ ՀՀ լեզվի կոմիտեն ամփոփեց «Տարվա բառը-2023»-ի արդյունքները։ Տեղեկությունը հայտնում է կոմիտեի մամուլի ծառայությունը։

Նշվում է, որ 12 քվեարկվածներից ամենաշատ ձայները` 42%, ստացել է «ապրումակցում» բառը։

«Թեև դիմացինի ապրումները սեփականի պես զգալը միշտ էլ հատուկ է եղել մարդուն, բայց «ապրումակցում» բառը նորաբանություն է։ Հավանաբար ստեղծվել է «կարեկցում» բառի նմանությամբ, բայց որպես երևույթ ավելի ընդգրկուն է»,– նշում են Լեզվի կոմիտեից` հավելելով, որ այն ունի բառարանային գրանցում։

Թե ինչու է նախապատվությունը տրվել հենց այս բառին, կոմիտեից պարզաբանում են այսպես.

«Մարդկային հարաբերություններին ուղղված մեր թարմ հայա՞ցքն է բնորոշում այն, մեր կարիք–ակնկալի՞քը դիմացինից, թե՞ այդ ամենամարդկային հատկանիշը կորցնելու վախը։ Գուցե բոլորը միասին»։
Ըստ քվեարկության արդյունքների` երկրորդ տեղում խաղաղություն բառն է` 30%։

«Սա մենիմաստ բառ չէ, բայց մեզ համար այսօր այն նախ և առաջ նշանակում է պատերազմի, հակամարտության բացակայություն, և բնական է, որ շատերի հայացքը նրան է ուղղված։ Կարևոր է նաև մարդու ներքին խաղաղությունը։ Իսկ դրա համար այս բառի մյուս իմաստներն են պետք․ լռություն, հանդարտություն, անդորրություն, հաշտություն և այլն»,– պարզաբանել են կոմիտեից։

Երրորդ տեղում «հայասաթ» բառն է` 7%։

Ըստ կոմիտեի` Հայասաթ-1-ը հայկական առաջին տիեզերական արբանյակն է։ Բառը ստեղծվել է հայ և լատիներեն ծագմամբ satelles` արբանյակ բառերից, որոնք միացել են ա հոդակապով։ Բնորոշում է մեր լավատեսությունը Հայաստանի գիտական ապագայի նկատմամբ։

Նշենք, որ «Տարվա բառ» ընտրելու համար քվեարկության էր դրվել 12 բառ`

1.Ապրումակցում

2.Արդարամիտ

3.Գործակարգավարական խորհրդակցություն

4.Գրավչություն

5.Զարդապատյան

6.Խաղաղություն

7.Խաչմերուկ

8.Խոսույթ

9.Հայասաթ

10.Մրգատուն

11.Տարակարգ

12.Տնտեսվարող

Նախորդ 2 տարիներին քվեարկությամբ առավելագույն ձայներ են ստացել «առաջնագիծ» (2021 թ․) և և «գիտարբուք» (2022 թ․) բառերը։