Մենք երբեք չենք թաքցրել, որ եղել են Ռուսաստանի հետ մի շարք խնդիրներ, որոնց մասին խոսել ենք: Այս մասին Իրանի ԱԳ նախարարի հետ ասուլիսի ժամանակ հայտնեց ԱԳ նախարար Արարատ Միրզոյանը: Նրա խոսքով՝ դրանք վերաբերել են առաջին հերթին ՀԱՊԿ շրջանակներում Հայաստանի Հանրապետության ակնկալիքներին, դրանց իրականացմանը կամ չկատարմանը։
Միրզոյանը Սանկտ Պետերբուրգում ԵԱՏՄ երկրների ղեկավարների գագաթնաժողովին ՀՀ վարչապետ Նիկոլ Փաշինյանի մասնակցությունը բացատրել է նրանով, որ Երևանն այդ կազմակերպության աշխատանքն արդյունավետ է համարում։ Նախարարն այդպես է պատասխանել այն հարցին, թե ինչու է Փաշինյանը մեկնել ՌԴ ՀԱՊԿ–ի և հենց Ռուսաստանի հասցեին բազմիցս հնչող քննադատությունների ֆոնին։
«Դժվար թե դուք լսած լինեք, որ մենք խոսենք, թե ԵԱՏՄ–ից մեր ակնկալիքները չեն արդարացվել, ինչպես դա եղել է ՀԱՊԿ–ի դեպքում։ Թեև ձեւակերպումները կարող են պայմանական լինել, այստեղ էլ խնդիրներ կան, բայց չեմ կարծում, որ կմտաբերեք նման դրվագ, որ Հայաստանը քննադատի Ռուսաստանին՝ ԵԱՏՄ համատեքստում։ Այնտեղ էլ կան խնդիրներ»,- ասել է նա։
ՀՀ ԱԳ նախարարը նաև պարզունակ համարեց այն մոտեցումը, ըստ որի Փաշինյանի մասնակցությունը ԵԱՏՄ երկրների առաջնորդների գագաթնաժողովին նշանակում է հրաժարվել ԵՄ հետ հարաբերությունների խորացումից։
