Գերիների խնդիրը կառավարության ամենօրյա ուշադրության կենտրոնում է, այս մասին ուղիղ եթերում հայտարարեց վարչապետ Նիկոլ Փաշինյանը։
«Ես պետք է ափսոսանք հայտնեմ, որ այդ հումանիտար հարցն օգտագործվում է քաղաքական նպատակներով, ինչը, իմ կարծիքով, այնքան էլ տրամաբանական չէ», – նշեց նա։
Վարչապետի խոսքով՝ հայկական կողմը պատրաստակամություն է հայտնել ու հայտնում ճկունություն ցուցաբերել այս հարցում, աշխատել Ադրբեջանի հետ, որպեսզի գերիները վերադառնան։
«Բանակցությունները մի ուղղությունն են, ընդ որում, մենք պատրաստակամություն ենք հայտնել, որ Հայաստանում դատապարտված ադրբեջանցի անձանց փոխանակենք մեր գերիների հետ բոլորը բոլորի դիամց սկզբունքով՝ հարցին տալով բացառապես հումանիտար բնույթ», – նշեց Փաշինյանը։
Աշխատանքը գերիների վերադարձի հարցով շարունակվում է. երկրորդ ուղղությունը իրավական ուղղությունն է։ Հայաստանը դիմել է ՄԻԵԴ, իրավական այլ ատյաններ։
«Այդ աշխատանքը բավարար համարվել չի կարող, քանի դեռ մեր գերեվարված եղբայրները չեն վերադարձել Հայաստան, մենք այդ ուղղությամբ շարունակելու ենք բոլոր ջանքերը գործադրել։ Ես դժգոհ եմ, որ չենք կարողանում մինչև այս պահը արդյունքներ արձանագրել, բայց դա մեզ չպետք է հուսահատեցնի», – ընդգծեց Նիկոլ Փաշինյանը։
Նա ներողություն խնդրեց գերիներից, նրանց հարազատներից, որ մինչև այս պահը ոչ մի հաջողություն չկա։
Վարչապետը հիշեցրեց, որ 2020 թվականից ի վեր՝ հարյուրից ավելի գերիներ են վերադարձել Հայաստան։
