Սեպտեմբերի 3-ին, գիշերվա ժամը 3.30-ին, «1-02» զանգած անհայտ քաղաքացին հայտնել էր, որ մայրաքաղաքի Թամանցիների փողոցում, հյուրանոցային համալիրից լսվում են կրակոցի ձայներ:
Այս մասին հայտնում են ոստիկանությունից։
Հաղորդումը փոխանցվեց ոստիկանության Շենգավիթի բաժին, որտեղից էլ օպերատիվ խումբը մեկնեց դեպքի վայր: Մեկնել են նաև պարեկներ:
Դեպքի վայրի զննությամբ հայտնաբերվել են «ԱԿՍ» տիպի ինքնաձիգ, 4 փամփուշտ և 12 պարկուճ:
Շենգավիթի քրեական հետախույզների և մայրաքաղաքի պարեկների համատեղ ջանքերով սեպտեմբերի 3-ին, ժամը 4.10-ին, խուլիգանություն կատարելու կասկածանքով ձերբակալվել և բաժին է տեղափոխվել երեք տղամարդ: Նրանցից մեկը` 29-ամյա երիտասարդը հայտնել է, որ ինքնաձիգից ինքն է կրակել օդ:
Երեքն էլ ներկայացվել են քննչական բաժին:
Բացի կրակողից` մյուս երկուսը բաց են թողնվել:
Նախաձեռնվել է քրեական վարույթ, նախաքննությամբ հանգամանքները պարզվում են:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
